في أسماء لنجوم كبار في الوسط الفني، بيفضل تقلها ومكانتها محفوظة ومؤثرة، حتى بعد وفاتهم ورحيلهم عن الدنيا، لإن التراث الفني اللي بيسيبوه للجمهور، بيفضل يحيي ذكراهم مهما تمر سنين.. ومن غير شك، من الأسماء اللي هتفضل لامعة في عالم الفن هو النجم الكبير والراحل نور الشريف، اللي تصدر اسمه الترندات بعد ما سمعنا إنه هيتم الاستعانة بيه في عمل درامي قادم.. طب إزاي؟
المخرج محمد سامي قرر يستعين بصورة وشخصية نور الشريف في العمل الدرامي المشارك في السباق الرمضاني الجاي “نسل الأغراب”، واللي من بطولة نجمين كبار وهما أحمد السقا وأمير كرارة.. وصورة نور الشريف هتكون متعلقة على حيطان بيت “غفران غريب” والد أمير كرارة. ومش بس النجم الراحل نور الشريف هو اللي هيتم الاستعانة بمكانته في العمل ده، ولكن كمان النجم الكبير والراحل محمود مرسي هيظهر كتجسيد لدور والد أحمد السقا في المسلسل، في شكل صورة معلقة في بيته. ودي مش أول مرة المخرج محمد سامي يستعين بصور عظماء ونجوم راحلين ، فكمان في مسلسل الأسطورة، استخدم محمد سامي بصورة النجم الراحل عبد الله غيث.
الجميل في الموضوع، إن استخدام صور عظماء النجوم الراحلين في الأعمال، رغم عدم وجود ضرورة لعمل ده ووجود آلاف البدائل، بيدي شعور بالوفاء والانتماء للنجوم الراحلين، اللي ممكن يكونوا رحلوا جسديًا، لكنهم لسه موجودين معانا معنويًا واستخدام أسماء كبيرة زيهم في أعمالنا الجديدة، مش مجرد “صور” معلقة في لوكيشن تصوير، لإن القيمة المعنوية والمؤثرة أكبر من كده بكتير وهي إن لسه في وفاء للجيل القديم اللي الكل لسه بيتتعلم منهم، ونجوميتهم لسه بتضيف للأعمال الفنية ومصدر للفخر هنفتكره طول العمر.
آخر كلمة: ماتفوتوش قراءة: “بعد آخر حلقة: إيه سر حب الناس الكبير لمسلسل في بيتنا روبوت؟“.