لدعم الصحة النفسية للمرأة ومواجهة العنف اللي بتتعرضله سواء جسدي أو نفسي، المجلس القومي للمرأة ووزارة الصحة تعاونوا لإنشاء “وحدة المرأة الآمنة” في عدد من المستشفيات، منهم مستشفي القصر العيني ومستشفى المنصورة، الوحدة مخصصة لاستقبال وتقديم الدعم الطبي والنفسي والخدمات للسيدات اللي تعرضت للعنف، وده ضمن المبادرة اللي أطلقتها الأمم المتحدة لمناهضة العنف ضد المرأة.
المبادرة هي الأولى من نوعها في المستشفيات المصرية، وهتقدم خدماتها بالمجان من فريق متخصص علميًا من أطباء نسا وتوليد وأطباء للصحة النفسية وأطباء من الطب الشرعي، والخدمات اللي بتتقدم من الوحدة بتتميز بالسرية التامة نظرًا لحساسية بعض الحالات، والوحدة جاهزة لاستقبال الحالات في أي وقت على مدار الأسبوع، ومن غير حجز مسبق، للتسهيل على كل بنت أو سيدة بتتعرض لعنف من أي نوع، لإن تلت سيدات العالم بيتعرضوا للعنف بصورة أو بأخرى.
العنف اللي بتتعرضله المرأة مش شرط يكون متمثل في الضرب أو العنف المادي الملموس، كمان الحرمان من الميراث أو الحرمان من التعليم أو الإجبار على الزواج المبكر، دي كلها أشكال مختلفة من العنف، حتى العنف النفسي اللي بيتعرضله الكتير، من توبيخ أو انهزام نفسي أو تقليل من الشأن أو تقليل الثقة بالنفس، كمان لازم مننساش الحالات اللي بتتعرض لعنف نفسي بعد الولادة، أو بتتعرض لإكتئاب الحمل.