بدل نجوم السينما: كيف تحولت من ماركة مسجلة إلى مادة كوميدية؟

زي ما كان فيه أزياء شهيرة للستات في السينما المصرية، زي “جلابية هنومة” في فيلم باب الحديد وفستان زوزو في خلي بالك من زوزو، كان برضه للرجالة نصيبهم من أزياء البدل اللي بقت علامة فارقة في الأفلام والمسلسلات.

لو دورت شوية هتلاقي كمان في حاجات كانت ماركة مسجلة زي “البدل” اللي هنتكلم عنها النهارده، ونقولك على أشهرها وسرعان ما تحولت إلى مادة كوميدية بين المستخدمين على منصات التواصل الاجتماعي.

خلف الدهشوري خلف

طل علينا بيها لأول مرة في فيلم “صعيدي في الجامعة الأمريكية”، وبرغم أن اسمه كان عامل قلق بس البدلة كانت عاملة تأثير أكثر، لدرجة أنها بقت نموذج للأزياء يحتذى بيها عند الرجالة والستات، وده لما لبسها محمد صلاح في جلسة تصوير له حديثا، ولما ظهرت في ريد كاربت لنجوم هوليود.

فطوطة الخضراء

بدلة فطوطة كان لونها أسود واتحولت لأخضر. فطوطة اللي كان معروف بشعره الأسود المنكوش، والبيبون الأسود الضخم، وهويته اللي خلقتها مصممة الأزياء وداد عطية، وكانت جزء أساسي من شخصية فطوطة اللي اتقدمت لسنين في فوزاير رمضان (فوازير فطوطة وسمورة) وأغنية “بابا جاي امتى جاي الساعة 6”.

بدلة حزلقوم

مش أول مرة مسيو حزلقوم يظهر في الكبير أوي ببدلة غريبة، أوقات كان بيظهر ببدل مشجرة وأوقات كلها ترتر زي اللي طل بيها علينا في حفلة مهرجان المزاريطة، ده غير الألوان المطرقعة اللي زغلل عنينا بيها زي الأصفر والفوشيا.

بدلة رشدي

رشدي في فيلم جعلتني مجرمًا واللي قام بدوره أحمد حلمي، كان عنده شوية بدل بيأجرهم من عند أبو نسمة، وفي بدلة بالتحديد كانت هي البطل طول الفيلم كل ما تتبهدل يغسلها وينشرها ويلبسها تاني.

سمير وشهير بهير

في فيلم سمير وشهير وبهير ظهر الثلاثي بأكثر من بدلة بألوان وأشكال مختلفة، وشيكو كان راعي البدل المشجرة، والكاروهات، وده بعد ما صحيوا الصبح لقوا نفسهم في السبيعينات.

لإننا مش خبراء في الموضة ولا حاجة، حبينا نتكلم عنها بس بطريقتنا كمتفرجين، الحاجات اللي علقت معانا واللي حسينا إنها كانت علامات فارقة ومميزة في أزياء الرجال على الشاشة في السنين اللي فاتت.

آخر كلمة: ماتفوتوش قراءة:أضافوا روحهم ولمساتهم: أشهر منسقي الأزياء في الوطن العربي