أجواء الكريسماس والـ “Hoodies” الحمراء بدأت تغزو شوارع العالم كله.. لازم كده الأجواء الاحتفالية تبدأ من بدري! ولكن السنة دي هيبقى أول كريسماس نحتفل بيه في زمن الكورونا، وللأسف في ناس هتبقى مصابة وقاعدة في الحجر المنزلي، وفي كمان اللي مش هيقدر يحتفل في أماكن زحمة خوفًا من العدوى بالمرض، فهيضطر يقضي الكريسماس ده، عكس كل سنة في البيت.. بس هل ده معناه إن خلاص كده مفيش متعة ولا هنحس بالأجواء الاحتفالية؟ لأ طبعًا!
آه ممكن يكون الكريسماس ده مختلف شوية، بس الطقوس المميزة اللي فيه لسه موجودة ولسه نقدر نعملها، فقبل ما تعيط وتتحسر على الكريسماس اللي بتستناه من السنة للسنة، واللي انت فاكر إنك مش هتعرف تعمل فيه حاجة، تعالى نقولك على مجموعة من الأفكار اللي ممكن تعملها علشان تحصل على أكبر قدر ممكن من المتعة والـ”Christmas vibes” وانت قاعد ملك في البيت..
حضر مشروب الشوكولاتة الساخن بتاعك في مج سانتا المفضل عندك
هو في إيه أجمل من شرب شوكولاتة ساخنة في جو ساقع زيّ ده؟ لازم تختار المج اللي انت هتشرب فيه بعناية، فكل ما يكون لونه أحمر أكتر وكل ما يكون سانتا باين فيه، كل ما هتحس بالكريسماس أكتر! ويا سلام لو حطيت شوية مارشميلو جوا الكوباية..
علق زينة وأنوار الكريسمس في كل حتة في البيت
مش هعرف أشوف شجرة الكريسماس والزينة في الشوارع؟ يبقى مش هسيب مكان في البيت مافيهوش زينة علشان ميبقاش فايتنك حاجة! وجود الزينة في كل حتة هيخلي أجواء الكريسماس موجودة معاك في كل غرفة، وهيخليك تحس إن جو البيت مبهج ومتناسق.
البس شراب الكريسماس واتفرج على فيلم مع عيلتك
مع مشروب الشوكولاتة الساخن اللي حضرناه وشراب الكريسماس “الكوزي” اللي لبسناه، يكمل الموود مع إن إحنا نجيب فيلم للكريسماس زيّ Home Alone اللي بيُعتبر الراعي الرسمي لأفلام الكريسماس.. ونطفي النور ونستمتع بالفيلم، اللي حتى لو شوفناه مليون مرة، برضه هنضحك وهنستمتع بيه.
شغل أغاني الكريسماس أول ما تصحى من النوم
بيقولوا إن أول شعور بتحس بيه أول ما تصحى، هو اللي غالبًا هيكمل معاك لآخر اليوم مش كده؟ فممكن أول ما تصحى تشغل موسيقى الكريسماس الهادية، علشان تبقى موجودة في الخلفية كده، وانت بتاكل بتقرأ كتاب أو حتى مريح على الكنبة… هتفرق!
تبادل الهدايا مع أفراد عيلتك تحت شجرة الكريسماس
هو أصلًا إيه فكرة الكريسماس؟ مش إن إحنا نتبادل الهدايا مع الناس اللي بنحبهم ونحس بالامتنان لوجودهم؟ ومين أهم من عيلتك تقدر تعبر ليهم عن حبك وتقديرك لوجودهم في حياتك.. ممكن تعملوا لعبة الـ “secret santa” الشهيرة مع أهل بيتك، وتتبادلوا الهدايا مع بعض وانتوا تحت شجرة الكريسماس اللي زينتوها مع بعض.. أعتقد مفيش جو “cozy” أكتر من كده!
افتكر دايمًا إن مش مهم الظروف ولا المكان، المهم رد فعلنا إحنا إيه على اللي بيحصل وإزاي بنختار إننا نبص للموضوع.. مين عارف، يمكن لما تعمل شوية من الحاجات دي وتقضي كريسماس بسيط ومريح، ترجع تقول بعد كده إن ده كان أحلى كريسماس عدى عليك!