بعد تكريمها في مهرجان القاهرة.. أعمال متتنسيش لمنى زكي

مهرجان القاهرة السينمائي الدولي في دورته الـ 42، كرّم منى زكي بجائزة فاتن حمامة عن التميز عن مجمل أعمالها الفنية في مسيرة فنية مليانة بالأعمال اللي متتنسيش، وعلامات في تاريخ الفن المصري والعربي مش بس السينما، كمان الدراما والمسرحيات، اللي منهم عايشين معانا من طفولتنا زيّ “كده أوكيه”، “عفروتو”، “أفريكانو”، وكتير من الأعمال اللي مستحيل تتنسي، وكمان كان فيه أعمال فنية عظيمة شاركت فيها لكن مش الكل يعرفها، أو مش مشهورة وواخدة حقها زيّ الباقيين.. تعالو نعرف إيه هما.

كلمة منى زكي بعد فوزها بجايزة فاتن حمامة للتميز، ضمن فعاليات افتتاح مهرجان القاهرة السينمائي في دورته الـ 42#Ciff

Posted by Scoop Empire on Wednesday, December 2, 2020

مسلسل الضوء الشارد

سنة 1998 كانت سنة مميزة للفنانة الجميلة منى زكي، وقدمت في مسلسل “الضوء الشارد” شخصية “فرحة” اللي حبها “فارس” اللي قدم دوره الفنان محمد رياض، وعملت أداء كبير كموهبة شابة ساعتها،  والمسلسل كان فيه فنانين عملاقة زيّ ممدوح عبد العليم، وسميحة أيوب، والمخرج مجدي أبو عميرة.

فيلم اضحك الصورة تطلع حلوة

كان في نفس السنة “1998”، وجسدت شخصية “تهاني” في دور بنت الفنان الكبير أحمد زكي، وقالت إنها بتفتخر بالدور دا جدًا، وكانت شخصية منى هي المحرك الأساسي في معظم أحداث الفيلم، وكان من الأدوار اللي متتنسيش لمنى، والفيلم من بطولة الفنانة ليلى علوي، قصة وسيناريو وحيد حامد، وإخراج شريف عرفة، وكمان كان بداية انطلاقة الفنان كريم عبد العزيز.

فيلم دم الغزال

جسدت منى دور “حنان”، وقدرت بمشاركة نجوم كبار زيّ نور الشريف، ويسرا، وصلاح عبدالله، إنها تقدم واحد من أجمل الأدوار في مسيرتها، وقالت منى إنه من أقرب الأعمال لقلبها، وإنها بتحب الفيلم ده جدًا علشان فكرته، والفيلم من تأليف وحيد حامد، وإخراج محمد ياسين.

مسلسل العائلة

كان أول عمل تليفزيوني ليها في سنة 1994، وشاركت مع نجوم كبار زيّ محمود مرسي، وليلى علوي، وعبد المنعم مدبولي، وخيرية أحمد، وتأليف وحيد حامد، وإخراج إسماعيل عبد الحافظ.

فيلم الحب الأول

كان سنة 1999، وقدمت فيه منى دور من الأدوار اللي فعلًا متتنسيش، ومفيش حد فينا ماشفش الفيلم ده، واتشد مع أحداث الفيلم الرومانسية، وكمان كان في كوميديا وسط الأحداث، و”الحب الأول” كان بطولته كلها شباب وقتها زيّ مصطفى قمر، وحنان ترك، وهاني رمزي، وطارق لطفي.

فيلم عمر 2000

دا كان أول عمل لمنى مع أحمد حلمي، وجسدت شخصية “بيبو”، ودا يُعتبر من الأعمال اللي كان لمنى دور كبير فيه رغم إنها كانت لسه صغيرة، وشارك معاها في الفيلم غير حلمي، خالد النبوي، وماجد الكدواني، ومن تأليف وإخراج أحمد عاطف.

آخر كلمة: ماتفوتوش قراءة: ثنائي القوة: في عيد ميلاد منى زكي وأحمد حلمي، تعالوا نفتكر أحلى لحظاتهم مع بعض.

تعليقات
Loading...