بعد تحديد يوم 7 يونيو لبدأ امتحانات الثانوية العامة، مخاوف بسبب فيروس الـ “كورونا” دفعت الطلاب للمطالبة بتأجيلها على تويتر
طلاب الثانوية العامة على تويتر دشنوا هاشتاج “#حياتنا_مهمة_زي_طلاب_النيل” بعد ما عرفوا عن قرار إلغاء امتحانات الثانوية لطلاب شهادة النيل الدولية وتبديلها بطرق تقييم تانية بسبب مخاوف من انتشار عدوى “كوفيد-19”.
طلبة كتير بتطالب بتأجيل أو إلغاء الامتحانات بسبب خوفهم من النزول للجان بعد أقل من شهر خصوصًا في الوقت اللي الحالات فيه في مصر بتزيد بشكل ملحوظ.
أما رد الدكتور طارق شوقي وزير التربية والتعليم فكان إن مدارس النيل المصرية تتبع صندوق تطوير التعليم التابع لمجلس الوزراء، وبالتالي فهي مش بتخضع لنظام الثانوية العامة المصري، ووضح الوزير إن مفيش أي أسلوب بديل ممكن يستخدم لتقييم الطلاب غير الامتحانات في اللجان.
السنة دي في حوالي 660 ألف طالب من أنحاء الجمهورية هيدخلوا امتحانات الثانوية العامة وفي ظل المخاوف من الكورونا أعلنت وزارة التربية والتعليم إن هيتم ضخ 950 مليون جنية مصري لتأمين اللجان والطلبة من “كوفيد-19”. وطبقًا لتصريحات الوزير هيكون فيه بوابة تعقيم في كل لجنة، وهيتم تعقيم الفصول واللجان وورق الامتحان كل يوم، ده غير إن هيتم توزيع 25 مليون كمامة على كل الموجودين في اللجنة من طلبة ومشرفين وعمال. كمان هيكون فيه عربية إسعاف مجهزة للتعامل مع أي حالة اشتباه.
وأضاف الوزير: “إحنا هنوفر للطلاب تأمين مش موجود فى البيت، المهم ميحضرش الأهالى مع الطلاب ويتكدسوا أمام اللجان”.
وردًا على فكرة عمل امتحانات قدرات للكليات وضح الوزير إن مقترح زي ده محتاج خطة كاملة وموافقة من البرلمان ومن الجامعات، وده مش هينفع يتعمل في وقت قصير زي ده. وبالإضافة لده قال الوزير: “إحنا ماشيين بالقانون مش بالهاشتاج والجروبات والاستغاثات، الحل الوحيد عندنا هو عقد امتحانات الثانوية العامة.”
وعلى الهاشتاج ألاف من الطلبة عبروا عن خوفهم الشديد من النزول والاحتكاك بغيرهم في وقت تخطت فيه الحالات حاجز الـ 9 ألاف حالة في مصر.