أحدث صيحات السرقة: ساحرة استولت على بيوت جزائرية بالتنويم المغناطيسي

يمكن تفتكره في مشهد لعبد السلام النابلسي وزوزو ماضي من الخمسينات في فيلم “في الهو سوا” ووقتها كانت بداية معرفتنا بما يسمى بـ”التنويم المغناطيسي”، وانتقلت من الأفلام وبقت واقع مرعب عاشته منطقة شرق الجزائر في لاية خنشلة، لحد ما قدروا يحلوا لغز “الساحرة” المزعومة.

كانت بتخبط على البيوت وتخترع وتألف أي قصة بس علشان تقدر تخطي عتبة البيت، وبعد ما تقعد ويطمنوا لها الأهل تبدأ في تنويمهم مغناطيسيًا، ويصحوا من النوم مايلاقوش في الشقة غير الحيطان والأبواب والبلاط.. الموضوع ده استمر لأشهر حصل فيه عمليات سرقة متتالية من مناطق بعيدة عن بعضها، ومؤخرًا بس قدروا يحلوا لغز الساحرة ويتم القبض عليها وشهادات الضحايا أكدت الموضوع ووصفوها بأنها شخص غير عادي قدر إنه يسيطر على عقولهم.

بيحكي شاهد فيهم أن والدته كانت موجودة في البيت لوحدها وواحدة خبطت عليها وهي بتعيط علشان مش لايقة حاجة تاكلها، ولما والدته دخلت المطبخ ماقدرتش تطلع منه وكإنها كل شوية كانت بتنسى حاجة وترجع له تاني، وفي الوقت ده الساحرة كانت دخلت غرفة نومها وسرقت كل الدهب والمجوهرات.

مواصفات الساحرة اللي أدلى بيها الضحايا، ساعدت القوات الأمنية إنها توصل لها وتلاقي في بيتها المسروقات ومستلزمات وطلاسم وقصاصات مكتوب عليها تمائم بتستخدم لغرض التنويم المغناطيسي.

آخر كلمة: ماتفوتوش قراءة: هدى العبيداء: سعودية نجحت في تحقيق حلم الدراسة بعمر الـ60 عامًا