قبل مرحلة الياهو ميل والهوت ميل والعصر اللي كتير مننا كان فاكر إن مفيش قبله وإن هو بداية التكنولوجيا كلها وبداية عصر الرسايل والإيميلات، اتضح إن كان في قبلهم ما يسمى بالـ icq واللي بتعتبر اختصارًا لكلمة “I Seek You” بمعنى عايز أوصل لك رغم المسافات.
كانت واحدة من أوائل الخدمات اللي قدمت طريقة للتواصل المباشر النصي للمستخدمين في نهاية التسعينيات، وماكنتش مربوطة بأي إيميلات، وكان الرمز هو الأساس في تمييز كل حساب وربطه بمالكه، ولو صاحبه نسي الرمز، يستحيل دخول الحساب، والرمز كان مكون من 5 أرقام عشوائية، يقدر بيها المستخدمين يدوروا على بعضهم.
وفضلت تتطور بفضل الابتكارات التكنولوجية في الوقت ده وبعد سنة واحدة من إنشائها في 1997، البرنامج وصل بالفعل لمليون مستخدم واستمر في النمو بمتوسط 100 ألف مستخدم جديد أسبوعيًا، وفي 1998 تجاوز 20 مليون من المستخدمين، وفي عام 2001، وصلت الخدمة إلى 100 مليون من المستخدمين حول العالم.
وحققت إنجازات لحد ما وصلت إلى نقطة مابقتش قادرة على المنافسة، في وقت سرعة المنافسة في السوق كانت أعلى من قدرة المنصة على المواكبة، ومع ظهور الخدمات التانية زي الياهو وغيره بدأ البساط ينسحب من تحتها ويظهر عيوب في الخدمات المقدمة.
واستمر منحنى النمو في الهبوط حتى 2010، ووصل عدد المستخدمين 42 مليون مستخدم بعد ما كان 100 مليون، وموخرًا أعلنت الشركة عن إنهاء المنصة خدماتها في شهر يونيو، وينتهي عصر الـICQ بعد 23 سنة من “هاي.. ممكن نتعرف؟”
آخر كلمة: ماتفوتوش قراءة: ميزة جديدة: لينكد إن لجلب الحبيب وتوفيق راسين في الحلال