كتير من العلامات المميزة لأجواء رمضان الاحتفالية اتغيرت مع مرور الوقت وتقدم التكنولوجيا، ومهما وحشتنا عاداتنا في رمضان زمان مش هنقدر نوصل إحساسنا بيها ولا ذكرياتنا معاها للأجيال الجديدة بالكلام بس. المشكلة دي ممكن تكون في طريقها للحل مع قناة دي إكس ميديا على اليوتيوب اللي عاملة سلسلة جديدة من فيديوهات نوستالجيا رمضان بشكل مختلف.
الفيديوهات دي بتجمع كل حاجة وحشانا، من فوازير وبرامج تليفزيونية وكورة وأغاني وغيرها، بإسلوب شيق بيوضح تاريخ كل حاجة، والاسباب اللي كانت بتخليها سابقة وقتها، وليه في منها مش مكمل معانا لحد دلوقتي، وكل ده في دقايق معدودة.
أول فيديو من فيديوهات السلسة دي بيركز على فوازير رمضان اللي ليها تايخ طويل من قبل ظهور فوازير نيللي وشريهان الشهيرة، وبيورينا الفيديو إزاي اتطور إنتاجها بشكل كبير وسريع خلاها تحقق النجاح الكبير ده وسط الملايين من أول السنين الأولى للبث الإذاعي في مصر لحد دلوقتي.
وزي ما رمضان مرتبط بيه ذكريات الاحتفالات والبرامج التليفزيونية، في أحداث كروية مهمة جداً حصلت فيه في السنين اللي فاتوا، وكل عشاق الساحرة المستديرة اللي عاصروها ميقدروش ينسوها. وعلشان كده ركز الفيديو التاني لدي نوستالجيا رمضانيات على ذكريات المصريين الكروية في رمضان خلال ال30 سنة اللي فاتوا، وأهم البطولات اللي حصلت في الشهر ده وغيرت في الساحة الكروية وقتها.
وفي تالت فيديوهات السلسلة، ركز فريق دي نوستالجيا رمضانيات على ذكريات حرب أكتوبر اللي حصلت في رمضان. وبصوت الفنان الكبير سيد رجب، ربطوا بين الحرب وأغنية وردة الشهيرة “على الربابة” اللي اتبرعت بيها هي وبليغ حمدي لمصر، وكان بيسمعها المصريين في كل مكان والجنود على الجبهة.
دي إكس ميديا هي نتاج التعاون بين شركتين إنتاج هما Balail productions و Orient productions، والشركتين بيجمعهم هدف واحد وهو إنتاج محتوى مُسلي وممتع وفي نفس الوقت هادف بيضيف معلومات جديدة للي بيتفرج. وفي الفترة اللي جاية هيعملوا فيديوهات أكتر بتتناول المواضيع اللي عايشة في ذكرياتنا ولسة مأثرة على أسلوب حياتنا لحد دلوقتي.