7 صور بتوضح موجة الحر في العالم كله – هل التغير المناخي هو السبب؟

كلنا في الوطن العربي عايشين موجة حر بشعة محدش شافها من زمان جدًا. مش عارفين نخرج الشارع بالنهار والتكيفات تقريبًا مش شغالة وكل الناس عرقانة وزهقانة وقرفانة والجو وحش جدًا.

الحقيقة إن موجة الحر اللي قرفتنا في عيشتنا دي مش في الوطن العربي بس. العالم كله عايش موجة حر بشعة محصلتش قبل كده. كل ده واحنا لسه في بداية شهر يوليو، وأعلي موجات حر بتحصل في الصيف بتكون في شهر أغسطس. هل معني كده إننا لازم نتوقع موجات حر أبشع من كده الشهر الجاي؟ غالبًا أه.

زيادة نسبة ثاني أكسيد الكربون في الجو بسبب التلوث الصناعي خلي الغلاف الجوي بيمتص حرارة الشمس ومش بيقدر يتخلص منها للفضاء مرة تانية. يعني الكوكب عمال يسخن ويسخن كل شوية وهيجي وقت درجة الحرارة هتزيد في كل حتة في العالم وفي مناطق مش هتبقي قابلة للسكن، زي منطقة الخليج العرب/الإيراني، والصحراء الكبرى في أفريقيا.

القطب الشمالي درجة حرارته هتزيد لدرجة هتخلي كل التلج يسيح وده هيسبب ارتفاع كبير جدًا في منسوب مياه المحيطات والبحار وهتبدأ تغطي مدن ساحلية كتير.

يعني هنخسر مدن ساحلية كاملة في غضون كام سنة لو مقدرناش نقلل التلوث الصناعي وننضف الغلاف الجوي من الزيادة في نسبة ثاني أكسيد الكربون.

خريطة موجة الحر في العالم كله

موجة الحر ضربت الشمال الغربي للمحيط الهادي بقوة، ودرجات الحرارة في أوريجون وبورتلاند وكندا ككل كسرت الأرقام القياسية علي مدار التاريخ يوم الأحد 27 يونيو 2021.

المناطق دي درجة حرارتها بقت أعلي من 99.8% من باقي دول العالم. المناطق الوحيدة اللي درجة حرارتها أعلي من كده كانت الصحراء الكبري في أفريقيا، شمال أفريقيا حيث الدول العربية الأفريقية، والخليج العربي/الإيراني، حيث دول الخليج العربي.

درجة الحرارة في كندا 46 درجة سليزيوس؟

دي أعلي درجة حرارة سجلتها كندا في التاريخ.

درجة الحرارة في الكويت نفس درجة حرارة كندا؟

موجة الحر
عن: جوجل

درجات الحرارة في الخليج العربي معروفة مناخيًا إنها من أعلي درجات الحرارة في العالم، ولكن لما تتوافق درجات الحرارة مع كندا، واحدة من أكتر الدول الباردة في العالم، يبقي في خطأ. العالم داخل علي أزمة مناخية ومنقدرش نتجاهلها.

الناس بتعمل كوكيز في العربية من شدة موجة الحر

درجات الحرارة العالية خلت العربيات حر كفاية علشان تسوي كوكيز جواها.

موجة الحر بتخلي البيوت حرفيًا بتسيح في بورتلاند

الناس بتعمل أوليت في البلكونة

أخر حاجة: الزرع بيموت

الصورة دي واحدة من صور كتير في مناطق شمال غرب المحيط الهادي والخليج العربي والصحراء الكبرى.

الزرع بيموت لأنه مش قادر يتحمل درجات الحرارة المجنونة دي. وده معناه أن في أجناس كتير من نباتات وحيوانات مش هتقدر تتحمل درجات الحرارة دي.

الطبيعة بتتغير ولو البشر قدروا يستخدموا التكنولوجيا علشان يتأقلموا مع درجات الحرارة، مش هيعرفوا ينقذوا باقي الأجناس اللي مش هتعرف تتأقلم.

مناخ الكوكب بيتغير والطبيعة مش هتسمحلنا كبشر نغيرها، الطبيعة أقوي مننا بكتير، ولو كشرت عن أنيابها وهاجمتنا بكل قوتها مش هنقدر نقف قصادها وكل التكنولوجيا والذكاء البشري مش هيعرفوا يهزموا الطبيعة الأم.

الطبيعة الأم بتعرف تتأقلم من جديد ولو قررت تمحينا من الوجود وتنضف نفسها بنفسها وتعيد دورة الحياة عليها من جديد هتعمل كده بكل سهولة. لازم نفهم قوة الطبيعة الأم ونعتذرلها بإننا نحترمها ونحترم الإيكولوجي بتاع الكوكب.

لازم نفوق ونعرف إننا بندمر الكوكب وإن موجة الحر دي مجرد إنذار من الكوكب علشان ناخد بالنا من أثار التلوث اللي بنعمله.

آخر كلمة: متوفتش قراءة.. في موجات الحر دي: ازاي تحمي نفسك من ضربة الشمس وازاي تعالجها

تعليقات
Loading...
Tweet
Share
Share
Pin