معروف إن أي عمل بيشارك فيه “تركي آل الشيخ” هيبقى متنفذ بمنتهى الإخلاص والحب، علشان كده أول لما شوفنا بوست على صفحته بيعلن فيه عن مسلسل جديد اتحمسنا كلنا، واللي زود الحماسة لما قال إنه هيبقى من تأليفه! طب إيه قصة المسلسل ده؟
الفكرة جت بعد ما “تركي آل الشيخ” خلص كتابة قصة عنوانها “الثمانية”، وكان محتار يحطها تحت أي تصنيف، لحد ماقرر يحولها لمسلسل يتعرض على الشاشة بنفس الاسم، ومن بعدها بدأ يختار عناصر العمل اللي هتساعد إنه يطلع للنور، فاختار في قائمة الممثلين: آسر ياسين وخالد الصاوي، هشام سليم وغادة عادل، محمود البزاوي وريم مصطفى، منذر رياحنة، ومحمود علاء، بالإضافة لعدد كبير من نجوم العرب والعالميين.
كاست المسلسل:
مش كل فريق العمل كان مصري، في جنسيات كتير هتشارك، أولهم الممثل السعودي “خالد صقر”، هياخد دور من الأدوار المهمة في المسلسل، وكمان في عناصر أجنبية تعتبر الأفضل في مجال التصوير، علشان يطلع العمل بأحسن جودة وتقنية، فاختار مدير التصوير “Tomas Oran Tomasson” واللي مشهور بفيلم “Pacific Rim”، وكمان بمهندس الصوت “Bill Dinnelly” ومن أهم أعماله “Aquaman”، بالإضافة لأكبر الشركات في مجال الجرافيكس والخدع وغيرهم من عناصر لتنفيذ المعارك والتفجيرات، وعشان يضمن اللهجة المصرية للأبطال تطلع مظبوطة، اختار السيناريست “عمرو سمير عاطف” علشان يساعده ينهي السيناريو ويكتب الحوار باللهجة المصرية.
المسلسل بدأ تصوير أول يوم فيه واتقال إنه هيتعرض على منصة شاهد وقنوات MBC، وبكده نقدر نضمه ضمن قائمة إنجارات تركي آل الشيخ المختلفة، الناس بتعتبر الراجل ده من الشخصيات المثيرة للجدل، خصوصًا في الفترة الأخيرة وبسبب الكلام اللي طلع عليه وأزمته مع ” أمال ماهر”، غير كل الكلام ده فهو واخد شهرته كونه قريب من العائلة المالكة، وإنه اتولى أكتر من منصب مهم زي “مستشار في الديوان الملكي”، “نقيب في وزارة الداخلية”.
رواية وفيلم “تشيللو”:
تعتبر أول رواية ليه، شارك بيها في ” معرض الرياض الدولي”، ولإن “آل الشيخ” مش بيكتب علشان الفلوس، نزل الرواية بسعر بسيط جدًا علشان كل الناس من مختلف الدول تقدر تشتريها وتقرأها، وكتب في ضهر الرواية “تباع الرواية بدولار أمريكي”
أغاني من تأليفه:
وجنب كل ده فهو شاعر غنائي، ومشهور بكتابة الأشعار العاطفية، وعنده تاريخ في كتابة الأغاني لأشهر المغنيين العرب منهم: محمد عبده، كاظم الساهر، عبد المجيد عبد الله وعمرو دياب، وده غير طبعًا “الديوان الشعري” اللي جمع فيه كل أشعاره الوطنية للأسرة الحاكمة.
هيئة الترفيه السعودية:
الإنجازات اللي عملها تركي في الهيئة لمدة 3 سنين، ودت السعودية في حتة تانية خالص، بقت من أول أربع وجهات ترفيهية على مستوى آسيا، ومن بين أول 10 على مستوى العالم، دخلت بسبها موسوعة “جينيس” للأرقام القياسية لإنها نظمت في الوقت الصغير ده أكتر من 68 فاعلية عالمية ودولية، وبعد ما كان السعوديين بيسافروا علشان يشوفوا العالم بقى هو اللي يجي عندهم! ويعتبر “موسم الرياض” من أكبر المواسم الترفيهية في تاريخ السعودية، الفاعليات اللي بتتم هناك، خلت الناس تشوف السعودية بشكل تاني.
نشاطه الرياضي:
وبرا عالم الفن والترفيه، أول علاقتنا بتركي آل شيخ كانت في مجال الرياضة، في سنة ٢٠١٧، لما كان بيمول النادي الأهلي، وبعد خلافات كبيرة بينه وبين إدارة الفريق، اشترى نادي كان اسمه “الأسيوطي” وسماه “بيراميدز” وقدر يحوله لنادي كبير منافس للزمالك والأهلي في أقل من سنة، أما في السعودية فهو رئيس”الهيئة العامة للرياضة في المملكة”، وصاحب نادي “ألميريا الأسباني”، “رئيس مجلس إدارة الاتحاد العربي لكرة القدم”.
وبكده يكون تركي آل شيخ جمّع خمس صنايع من السبعة، تفتكروا إيه هي الصنعة السادسة اللي ممكن تركي آل شيخ يطلع بيعرفها، ويفاجئنا بيها؟