في حاجة كده في الهوا لما تقعد على شط البحر، مزيج من النسمة والرملة والمياه وريحة البحر، أحاسيس مختلفة بس اللي بيكمل الحالة دي هو الأغاني، موسيقى تسمعها على الشاطئ.
أغاني فيها حنين، فيها فرفشة، فيها رومانسية على ضوء القمر، أو حتى لعب وضحك تحت الشمس، أغاني بتعكس الأجواء اللي أنت عايشها وسط المياه والهوا والفريسكا!
لو ناوي تقعد على البحر قريب، سواء في الساحل الطيب أو الشرير أو حتى على كورنيش إسكندرية، جهز السماعات والقائمة دي..
لا تفوّت قراءة: نجوم الغناء العربي يشعلون صيف 2025: ألبومات مرتقبة ومنافسة لا ترحم بين عمالقة الطرب
أنا بعشق البحر – محمد منير
أغنية هي في الأساس رومانسية موجهه للحبيبة للدرجة الأولى، بس في كلماتها اللي غناها الكينج محمد منير هتلاقيه بدون ما بيحس بيوصف البحر معاها.
أنا بعشق البحر زيك يا حبيبتى حنون ..وساعات زيك مجنون ومهاجر ومسافر
وساعات زيك حيران وساعات زيك زعلان
وساعات مليان بالصمت.
الأغنية دي مناسبة لو هتقعد على الشط بليل في الروقان وسط النجوم.
دقوا الشماسي – عبد الحليم حافظ
فيلم أبي فوق الشجرة كله فيه من روح الصيف، من أول الأجواء على الشط لحد أغنية دقوا الشماسي اللي غناها عبد الحليم واتغزل فيها بجمال اسكندرية.
وهو بيقول
دقوا الشماسي دقوا الشماسي من الضحى لحد التماسي، أحلى شمس وأحلى رمل وأحلى مياه
احنا وشبابنا وحبنا يا اسكندرية جايين على نسمة أمل نرتاح شوية
الأغنية مناسبة للناس اللي بتحب أجواء الصيف القديمة ومصايف زمان، هتفكرهم بالذي مضى!
أبو ويسرا – 3 دقات
الأغنية دي من أول ما طلعت وهي عاملة قلبان لحد دلوقتي، الفنانة يسرا والمطرب أبو أضافوا ليها بهجة وطاقة إيجابية.
ده غير إنها اتصورت في الجونة وكل مشاهدها بتعكس أجواء الصيف والأهم من ده قصص الحب اللي بتحصل على شط البحر والنظرات والهمسات!
وما أدراك ما اللحظات الرومانسية والقصص اللي بتبدأ من على هذا الشط، وعلشان كده الأغنية مناسبة تسمعها لو خارج في أي مكان على الشط وحاسس إنه خلاص قلبك هيبدأ يدق 3 دقات!
وقت غروب الشمس واقف ع البحر بعيد، عمال بحكيله وأشكيله وأشرح وأعيد
فجأة لقيتها وكنت فاكرها عروسة البحر، خارجة من المياه وطلتها أقوى من السحر
لما شوفتها قلبي دق تلات دقات، والطبلة دخلت لعبت جوة دماغي حاجات
لما الرق دخل قلبي رق وحنيت
طب هعمل إيه رحت أنا غنيت؟
لا تفوت قراءة: لو لسه مفركش وقلبك مكسور.. شغّل الأغاني دي عشان تعيش الوجع!
لما كان البحر أزرق – فرقة المصريين
“لما كان البحر أزرق والنجوم لسه في مكانها وطيور بتحلم فوق الشجر كل يوم .. وكان هناك البحر أزرق لكن في يوم كان لازم ابدأ”
دي أغنية مناسبة للناس اللي بتحب العمق والسرحان والتحليل في أمور الحياة على شط البحر.
وفي الغالب الشخصيات دي بتفضل إنها تقرأ كتب على البحر، وفرقة المصريين أنسب اختيار لحالة العمق.
كلمنتينا – سانت ليفانت ومروان موسى
أغنية من الأغاني التريند لصيف 2025، من أول ما نزلت انتشرت بشكل غريب والناس بقت ماشية ترددها في كل حتة وخصوصًا على شواطيء الساحل.
فدي مناسبة جدًا للناس اللي مش عايزة تحس إن فايتها حاجة حتى لو على شط البحر.
لا تفوّت قراءة: ليه بنحب نسمع الأغاني الحزينة؟ رحلة في عالم الألم والأنين
بلبطة – حسين الجسمي
دي من أكتر الأغاني الفرفوشة لحسين الجسمي ومن ضمن الأغاني اللي لازم تسمعها على شط البحر،
بتعكس أجواء الصيف والخطط اللي هتعملها في المصيف، صوت الجسمي في الأساس هو شعلة فرفشة وحركة هتلاقي نفسك من غير ما تحس عايز تقوم ترقص وأنت على الشط.
خصوصًا لما تسمع كلمات الأغنية اللي بتقول:
عايز أطلع مصيف وأصيف وأشوف البحر عايز أعمل tan وأبقى ف أروقان وأفصل م الحر وأبعد ع الناس وأشرب أناناس وأجيب نضارة أقعد في الشمس ياه ع الإحساس واقضيها بلبطة
وقال كمان أنه هيروح غردقة سُخنة وشرم وساحل شرير ومش هيهمه!
عمرو دياب -أماكن السهر
في الحقيقة ماكوناش عارفين نحط لعمرو دياب أغاني إيه ولا إيه، معظم أغانيه بتعكس روح الصيف وتتسمع على شط البحر حتى لو ماكنش الغرض منها.
بس يكفي مثلًا أغنية زي “شوقنا أكتر شوقنا” الناس بستمعها في أي حتة ومش بتفكرك بأي صييف لأ ده صيف التسعينات كمان.
بس قولنا نختار أغنية واحدة كانت أجوائها ومشاهدها على البحر وكلها بتعكس أجواء المصيف زي أغنية “أماكن السهر”
في أماكن السهر، أنا قمري طلع واتشهر
والناس يقلقوا لو ظهر، بيغطي على الحلوين
على البحر إن مشي، الموج يهدى ويختشي
كله بيزعل لو مشي، له حبايب بالملايين