من حوالي 10 سنين بقت الإعلانات اللي بتتعرض على التلفزيون بتشكل جزء كبير من اهتمام الجمهور، اهتمام وصل لدرجة تحليل وتفصيص الإعلانات ومش بس كده ده كمان بقوا يطلعوا عليها كوميكس، وبقوا يغنوا أغانيها في كل حتة زيّ المسلسلات والأفلام بالظبط، وخصوصًا في شهر رمضان، بيبقى في تركيز شديد من المحللين أو حتى من الجمهور، وده لإن أكبر نسبة إعلانات بتتعمل في الشهر ده بالتحديد.
وللسبب ده عملنا تجميعة لمجموعة من الإعلانات اللي تابعناها في رمضان سنة 2021، وشدت انتباهنا وعلقت لسبب من الأسباب معانا، وكمان كنا ماشيين نغنيها ونرددها في كل حتة!
إعلان يونيون إير – شيرين
الإعلان كان عامل حالة مختلفة عند الناس، شبه حدوتة بتشوف فيها قصة حياتك من وأنت طالب لحد ما تحب وتتجوز وتخلف وتكبر، والمشاهد التمثيلية وصلت الحالة المطلوبة اللي كان عايز يوصلها، وصوت شيرين اللي قادر إنك تحبه في كل حالاته.
إعلان فريش- دينا الشربيني وروبي
بطولة روبي ودينا الشربيني، والدويتو ده الناس حبته مع بعض أوي وقالوا إنهم كانوا الاتنين مناسبين لعمل الإعلان ده، لإنه كان بيتطلب خفة الدم ولذاذة، وهو ده اللي كان موجود عند الاتنين! وكلنا كنا ماشيين نغني الأغنية “احنا فريش وفرافيش، احنا فريش نحب نعيش”
إعلان فودافون- شيريهان
شيريهان كانت واحشة الناس كلها، وظهورها في الإعلان ده كان مفاجأة كبيرة وحلوة ليهم، قدمت لنا استعراض غنائي فكرنا بأيام زمان وبأعمالها اللي كلنا بنحبها.
أورنج – حسين الجاسمي
“رمضان في مصر حاجة تانية .. والسر في التفاصيل”، بصوت حسين الجاسمي المميز قدر إنه يوصف حالة المصريين بتبقى عاملة ازاي في رمضان، ميزة الإعلانات في موبينيل إن جزء كبير منها بيحب يوصف حالة وطبيعة الشعب المصري خصوصًا في رمضان، أغانيهم بتتكلم عن العيلة واللمة وعن صفات موجودة فينا زيّ أغنية دايمًا مع بعض وأغنية فاعل خير.
إعلان جمعية رسالة- أحمد عدوية
إعلان مختلف ومبتكر لجمعية رسالة عن فكرة التبرع بالحاجات اللي مش محتاجين لها للجمعية، علشان نساعد ونفيد غيرنا، وبدل ما كان يجيب ناس مشهورة تتكلم عن فكرة التبرع، لأ ده خلى الهدوم هي اللي تتكلم بس بصوت محمد عدوية.
صندوق مكافحة الإدمان – أنت أقوى من المخدرات
إعلان لمدة ثواني معدودة وعبارة عن مشهد واحد، وصل الرسالة بشكل أفضل مما يكون، أفضل من محاضرة طويلة أو ناس مشاهير يتكلموا عن خطورة الإدمان وحقق كمان فكرة الـ Marketing conception
إعلان وي- سمير غانم وإيمي
بنحب نشوفهم متجمعين مع بعض في أي حاجة، مسلسل أو إعلان أو فيلم أو حتى لقطة لثواني معدودة على الشاشة، الكاميرا بتحبهم والناس بتحب تشوفهم لروحهم الحلوة وخفة دمهم.