القراءة والكتابة مش مجرد هوايات بيمارسها البعض. في الكتابة بيلاقي المؤلفين ملاذ للكلمات اللي ماقدرتش تتنطق، اللي مالقتش ودن تسمعهم، أو عقل يستوعبهم. وفي القراءة، بيلاقي آلاف، لو مش ملايين من البشر، الراحة والأمان في كلمات شخص غريب، قدرت تعبر عن حاجات بيحسوا بيها وبيعيشوها، وماكانوش عارفين إن حد تاني (بيفصلهم مسافات وثقافات وحاجات تانية كتير عن بعض) ممكن يكون بيمر بنفس المشاعر. علشان كده الكُتّاب والمؤلفين ليهم دور كبير يستحق إننا نتكلم عنه. وعالية صادق من المؤلفات اللي نقدر نقول بكل ثقة، إنها تستحق الحديث عنها وعن كتاباتها.
مين عالية صادق؟
عالية صادق كاتبة معاصرة ومؤلفة لثلاث كتب لحد دلوقتي. عالية تخرجت من الجامعة الأمريكية تخصص فنون بصرية. وبعد فترة قصيرة، اكتشفت عالية شغفها العميق والكبير بالكتابة الملهمة أو الـ inspirational writing. ومن هنا، بدأت رحلتها في تأليف كتب ومشاركة أفكارها من خلال مدونتها الخاصة على انستجرام Thoughts by Alyaa، علشان تكون منصة تقدر من خلالها إنها تتبادل الأفكار والخبرات مع العالم.
كتب من تأليف عالية
ألفت عالية Soul Quest، واللي بيعتبر أول Journal أو مدونة استكشاف ذاتي وتفاعلية في مصر. أطلقت عالية الكتاب ده، بعد سنتين من بداية مدونتها على الانستجرام. ومن خلاله، قدرت عالية إنها توصل لمعاني أعمق داخل نفسها. فزيّ ما اختارت عالية إنها تطلق عليه، إنه “رفيق الرفاهية”. طيات الكتاب بتحمل كتير من التمارين وغيرها من الكلمات، اللي بتساعد الناس إنهم يوصلوا لمراحل أفضل من السلام النفسي وبتقربهم من الحقيقة اللي هما بيدوروا عليها.
الكتاب التاني، اللي خرج للنور بعد أول كتاب أصدرته، كان Equilibrium واللي بيعني “التوازن”. ومن اسم الكتاب، نقدر نستشف طبيعة الكتاب وهدفه، وهو إننا نوصل للتوازن الصحي في حياتنا.. من خلال الرحمة والقبول والشفاء.”صنعت الكتاب في فترة بعتبرها تحولية في حياتي ، علشان كده أؤمن جدًا بتأثيره على القراء بقدر تأثيره عليا أثناء كتابته.”
أما أحدث منشورات عالية صادق، فكان كتاب Harbour أو مرفأ. والكتاب ده بالذات كان مميز لأسباب كتير أولهم اسمه الغير مألوف. علشان كده وفي أول صفحة من الكتاب بتشرح لنا عالية المعنى المرهف وراء الكلمة.. اللي بيدل على المكان اللي بتسكن فيه. الكتاب ده هو الإنجاز اللي وصلت له عالية خلال رحلتها أثناء كتابتها. كل اللي توصلت له من سكينة وشفاء ذاتي..
مدونة الانستجرام
زيها زيّ أي إنسان، لسه عالية صادق بتستكشف طريقها، ولسه بتحاول إنها تغوص أكتر في رحلة اكتشافها الذاتية. واختارت إنها تشارك قرائها رحلتها وتجربتها في التعلم والتطور.. علشان كده ومن خلال مدونتها، تقدر تطلع على كتير من الأفكار الإيجابية والـ relatable.
أي شخص يقدر يكتب وينشر مدونات. بس مش أي حد يقدر يوصل لقلوب الناس، مش أي حد يقدر الناس إنهم يتوصلوا معاه من خلال كلمات مطبوعة على ورق.. من خلال قراءتك للمدونات اللي بتنشرها عالية في حسابها على الانستجرام أو حتى داخل كتبها.. بيقدر كتير من الأشخاص يلاقوا نفسهم في تجاربها، يحسوا بمشاعرها الصادقة، ويبتدوا يخطوا خطوات ثابتة في طريقهم لرحلة كبيرة من اكتشاف الذات والوصول للسلام النفسي.
بتأكد دايمًا الكاتبة عالية صادق إنها زيها زيّ أي شخص، بتمر بتحديات وصعوبات. ولكنها بتختار الكلمات كطريق ودواء، وبتختار مشاركة الناس لأفكارها، على أمل مساعدة كل اللي ممكن يكون بيمر بأشياء مشابهة.