مين يقدر يعيش من غير مياه؟ ولا حد.. المياه هي عنصر أساسي من الحياة، دي هي كمان اللي بتدي الحياة، فهي اللي مخليانا قادرين نعيش، وهي اللي بتروي الأكل اللي بناكله، والشجر اللي بيوفرلنا الأكسجين علشان نتنفسه، وبمناسبة اليوم العالمي للمياه اللي بيوافق يوم 22 من شهر مارس، حبينا نقولكم على شوية نصائح وحاجات نعملها علشان نحافظ على المياه.
كتير مننا ياما سمع عن “اقفل الحنفية كويس” أو “اقفلها وانت بتغسل سنانك”، ولكن معظمنا بيطنش، لإننا مش متخيلين حجم المياه اللي بنضيعها، فبنقول يعني النقطتين دول هما اللي هيفرقوا ! واللي مانعرفهوش إن آه النقطتين دول هيفرقوا، لإن نقطة على نقطة على عشرة هيملوا أكتر من جردل في اليوم، والجرادل دي تقدر تكفي استهلاكنا في يوم بحاله، فمن واجبنا إننا نقدر ده لإن في ناس كتير مش بيوصلها مياه نضيفة، إذا كان بيوصلهم مياه أصلًا.
فمثلًا لو هتفتح الحنفية علشان تغسل سنانك، اقفلها لغاية ما تيجي تشطفها بس. واقفل الحنفية كمان وانت بتستحمى في كل لحظة مش بتستخدم المياه فيها وكمان استهلك وقت أقل في الاستحمام، ونفس الكلام في وقت الطبيخ وغسل المواعين. ولما تيجي تصب مياه للشرب، ماتصبش أكتر من اللي هتشربه. ولما نيجي نسقي الشجر والزرع مانغرقش الدنيا بالخرطوم، ولكن نسقيهم بذكاء ودقة. ومثلًا ممكن نوعي أطفالنا يتجنبوا اللعب بالمياه.. ولازم طبعًا الناس تبطل ترش مياه في الشوارع بالخرطوم أو بأي طريقة لإن ده أكتر حاجة بتضيع المياه.
وبرضه من الطرق اللي نقدر بيها نحافظ على المياه إننا ممكن نستخدم حنفيات بتضخ مياه بدفع خفيف.. وخلوا في دماغكم دايمًا إن كل نقطة بتتحسب، ويمكن بالطريقة دي نقدر نوفر مياه.