10 عادات صحية غيرتها فينا 2020

في نهاية سنة 2019، العالم كله واجه خطورة مرض جديد، مرض صعب وقاتل، وهو فيروس كوفيد ـ 19 اللي انتشر من دولة الصين وسافر للعالم كله واللي أدى للغلق العام في تقريبًا كل البلاد وكمان بقى في تأثير سلبي على اقتصاد كل الدول، وكلنا اتحبسنا في بيوتنا، ولكن فكرنا إن أكيد في أي جوانب إيجابية من الجائحة دي، وفعلًا لقينا إنها علمتنا شوية عادات صحية كنا محتاجين نتعلمها وتبقى جزء من حياتنا سواء في فيروس قاتل أو مفيش.

غسل اليدين

اتعلمنا في الجائحة إننا لازم نغسل ايدينا كل شوية حتى لو مالمسناش أي حاجة بيها، لإن الميكروبات موجودة في كل حتة وايدينا معرضة ليها بكل الأشكال، وايدينا دي هي اللي بنستخدمها علشان نعمل كل حاجة في حياتنا.

غسل مشتريات البقالة والتعقيم المستمر

اتعلمنا إننا نغسل أي حاجة نشتريها من برا كويس ومانكروتش غسيلها، سواء من فاكهة وخضار، أو أي حاجة معلبة، أو مغلفة، لإن برضه الحاجات دي كلها بتتعرض لكل أنواع الجراثيم والتلوث.. ونعقم كل حاجة في البيت باستمرار مش في الأعياد بس.

غسل اللبس

اتعلمنا كمان إننا لو نزلنا من البيت، أول ما نرجع نحط كل اللي كنا لابسينه في الغسيل علشان يتغسل، رغم إنها حاجة ممكن البعض يعترض عليها إن كده ممكن اللبس يبوظ من كتر الغسيل، أو استهلاك مفرط للغسالة والكهرباء ومساحيق الغسيل، ولكن هو ده الصح، لإننا لما بننزل الشارع لبسنا بيلم كل أنواع الميكروبات اللي موجودة في الجو.

الاستحمام المستمر

اتعلمنا إننا لازم نستحمى يوميًا، وأكتر من مرة كمان لو اتعرضنا لبيئة خارجية عن البيت، لإن زيّ ما قولنا فوق إن في كل مرة بنخرج فيها للشارع بنتعرض لعوامل تلوث كتيرة وحتى لو إحنا فاكرين إن لبسنا هيحمينا منها ولكننا غلطانين لإن الميكروبات تقدر توصل لأي حتة.

تجنب اللمس العشوائي

عن: amazon

ومن العادات اللي اتعلمناها إننا نبطل نلمس أي حاجة بعشوائية ومن غير تفكير، لإننا متعودين إننا نلمس عادي حاجات مش عارفين أصلها إيه، زيّ درابزين السلم، أو نسند على حيطان الشارع، أو نمسك عواميد، أو نقعد على كراسي أو نعد الفلوس بإيدينا وبلساننا كمان.

التباعد

اتعلمنا أهم حاجة وهي التباعد، ففي جائحة أو لأ إحنا محتاجين ندي لبعض مساحة شخصية وندي للناس اللي قدامنا فرصة إنها تتنفس.

أكل البيت

عن: homeats

وكمان من العادات اللي اتعلمناها إننا نحب أكل البيت ونقرف من أكل الشارع اللي مابنكونش عارفين مصدره إيه ولا اتطبخ إزاي، وناكل الأكل البيتي المضمون اللي عارفين كل خطوة حصلتله وهو بيتطبخ.

الرياضة

رغم إن في ناس كتيرة طلعت غلها في الأكل في الحجر الصحي ولكن ناس أكتر اختارت إنها تمارس الرياضة، وبدأنا نتفرج على محتويات رياضية ونتعلم منها، أو كمان اختارنا إننا نتعلم حركة جديدة نتحدى بيها جسمنا.

وقت مع العائلة

عن: mpjewelry

اتعلمنا كمان إننا نقضي وقت مع أهالينا ونحب تقضية الوقت معاهم، بدل ما إحنا كنا على طول مش بنقعد معاهم ولا بنديهم لحظة من وقتنا.

امتنان الوقت

اتعلمنا إننا نقدر وقتنا، ومانضيعهوش على الفاضي، وإن كل دقيقة وكل ثانية لازم نحس بقيمتها ونحمد ربنا عليها ونستغلها صح.

آخر كلمة: ماتفوتوش قراءة: كل اللي محتاج تعرفه عن مشاكل البشرة اللي بتسببها الكمامة وطرق علاجها

تعليقات
Loading...