مفيش شك إن روبي عمرها ما فشلت في إنها تبهرنا سواء بجمالها أو رقتها أو حضورها في البرامج أو الأعمال الدرامية أو الأغاني، فهي ليها شعبية قوية جدًا عند الجمهور العربي كله بالذات المصريين من زمان من أيام ما كانت بتسأل ليه بيداري كده؟ ولكن ممكن نقول إن سنة 2021 هي سنة الحظ بالنسبة لروبي، بدأت من أول يوم في السنة لما ظهرت مع ويجز في برنامج صاحب السعادة اللي بتقدمه إسعاد يونس، وبقت تريند كذا يوم، وبعدها ابتدت الأخبار الحلوة لروبي لما أعلنت عن “ميني ألبوم” من 6 أغاني، نزل منه أغنيتين “حتة تانية” و”أنا لو زعلانة”.
ومن أسبوعين أحيت روبي حفلة في الأهرامات وكان في جمهور كتير حاضر.. بس الأخبار الحلوة هتقف لحد هنا ؟! لأ طبعًا، روبي أعلنت إنها هتقدم فوازير رمضان في الموسم الجاي، ولكن مفيش تفاصيل لحد دلوقتي عنها إلا اسمها اللي هيكون “فوازير روبي”، ده غير مسلسل “شقة 6” اللي انضمت بيه للسباق الرمضاني، والمسلسل من بطولة صلاح عبدالله وأحمد حاتم وهاني عادل ومحمود البزاوي ورحاب الجمل، وملك قورة، ومن 15 حلقة.
أما على مستوى السينما فروبي هتشارك في فيلم “كيرة والجن” لكريم عبد العزيز وأحمد عز كضيفة شرف، بالإضافة إلى فيلم “شلة ليبون” للمخرجة ساندرا نشأت.. كلنا مستنيين نشوف روبي في أعمال وأغاني أكتر وأكتر ونشوفها في حتة تانية فعلًا لإنها تستاهل كده.