دينا الشربيني راجعة للشاشات في مسلسلها الجديد “لعبة النسيان”
بعد نجاح مسلسل “زي الشمس” رمضان اللي فات، العالم العربي مستني -بفارغ الصبر- رجوع دينا الشربيني للشاشة في مسلسلها الجديد “لعبة النسيان”، اللي هيكون تاني بطولة رمضانية للفنانة.
المسلسل الجديد بيتكلم عن قصة أم من الطبقة المتوسطة فقدت ذاكرتها وبتبدأ تدخل في صراع مع نفسها عشان تقدر تتأقلم مع حياتها الجديدة وإنها تحاول تفتكر ماضيها. حبكة “لعبة النسيان” مليانة دراما ومفاجآت هتخليك مش على بعضك طول رمضان. إعلان المسلسل نزل على MBC مصر، وتقدروا تشوفوه من اللينك اللي تحت.
المسلسل سيناريو وحوار تامر حبيب وإخراج هاني خليفة وهو دراما اجتماعية مقتبسة من فورمات مسلسل إيطالي.
مش بس كدا، دينا برضه قربت تخلص تصوير فيلمها الجديد “يوم 13” اللي هيكون مليان إثارة ورعب، وبيشاركها في بطولته عدد كبير من الفنانين زي أحمد داود، نسرين أمين، جومانا مراد، وأحمد شاهين.
رمضان اللي فات، “زي الشمس” كسر الدنيا وحقق نجاح ملوش مثيل مع الجماهير والنقاد، الكل كان بيتفرج من حلقة لحلقة مستني يعرف مين قتل فريدة، ومن الواضح إن دينا ناوية تتخطى التوقعات وتحقق نجاح أكبر رمضان ده بمسلسلها “لعبة النسيان”.