مسلسل “النهاية” ليوسف الشريف هيكون غير أي حاجة شوفناها قبل كدا على التلفزيون!
عالم افتراضي سنة 2112، روبوتات بذكاء اصطناعي، صراع لبقاء البشرية، لو سألتك أنا بتكلم على إيه، هتفتكرني بتكلم على iRobot أو Blade Runner أو أي حاجة من هوليوود الإنتاج بتاعها هيكون ملايين الدولارات، بس لا، في الحقيقة أنا بتكلم عن مسلسل يوسف الشريف الجديد، “النهاية”.
“النهاية” هو حاجة مختلفة تمامًا عن اي حاجة شوفناها على التلفزيون المصريّ، مش بس كفكرة أو حبكة، بس كمان كتكنولوجيا وكجرافيكس، لإن اللي واضح من البرومو من السفن الفضائية اللي بتطير والـ virtual touch pads إن المسلسل مبنيّ بشكل كبير على الـ CGI.
القصة بتاعت المسلسل بتحكي عن روبوت ذكي إسمه زين في سنة 2112 في عالم افتراضي العالم فيه شبه اتدمر. زين ناقم على البشر و على دورهم في تدمير الكوكب، واللي واضح من البرومو إنه في صراع للقضاء على البني أدمين في العالم كعقاب لجرايمهم ضد العالم.
القصة مشوقة ومختلفة عن أي حاجة اتقدمت قبل كدا. ياسر سامي مخرج المسلسل في تصريحاته مع ON E كان فخور جدًا إن العمل مصري 100%، و إن مفيش أي شركات أجنبية تم استخدامها في أي مرحلة من مراحل انتاج المسلسل.
مسلسل “النهاية” فكرة يوسف الشريف وسيناريو وحوار عمرو سمير عاطف وإخراج ياسر سامى وإنتاج شركة سينرجى، وبيشارك يوسف الشريف في البطولة عدد من الفنانين زي عمرو عبد الجليل وأحمد وفيق وناهد السباعى ومحمود الليثى.