لو محتاج أي حاجة وفتحت اليوتيوب، غالبًا هتلاقي فيديو عنها، من مزيكا لمسلسلات أو من معلومات لطبخ، وده اللي بيخلي يوتيوب واحد من أهم المنصات الموجودة على الإنترنت في وقتنا ده. عشان تعرف قد إيه يوتيوب مهم في حياة معظم البني أدمين دلوقتي، حوالي 300 ساعة من المحتوى بيتم رفعها على يوتيوب كل دقيقة كل يوم، وحوالي 5 مليار فيديو بيتشافوا كل يوم على الموقع.
بس على الرغم من كل إيجابيات يوتيوب، إلا إن كان في مشكلة كبيرة بتواجه مستخدمينه على الموبايل، ودي هي إنك متعرفش تشغل الفيديو في الخلفية، ولازم الآب يفضل مفتوح على طول، وعشان كدا لأول مرة في مصر، الشركة قررت تصدر YouTube Premium ودي خاصية بتمكن المستخدم إنه يشغل الفيديوهات بتاعته من غير ما يكون فاتح التطبيق. بالإضافة لده، الخاصية مفيهاش أي إعلانات فهتتفرج من غير ازعاج، وطبعًا عليها هتقدر تعمل save لفيديوهاتك المفضلة وتتفرج عليها بعدين حتى لو إنت مش متوصل بالإنترنت.
مش بس كدا، الشركة أدركت كم المحتوى السمعي اللي عندها على المنصة وقررت تبدأ تجدوله في شكل جديد و ده هيكون خاصية YouTube Music، تطبيق المزيكا الجديد اللي هينزل ينافس في السوق، وعليه المستخدمين هيقدروا يسمعوا كل الأغاني اللي بيحبوها من غير ما يضطروا يفتحوا الفيديو ويستهلكوا باقاتهم. كمان تطبيق المزيكا من يوتيوب عنده خاصية “Discovery Mix”، اللي هتبدأ تقترح عليك مزيكا شبه المزيكا اللي إنت بتسمعها زي ما الموقع الأصلي بيعمل بالظبط.
كمان لو اشتركت في YouTube Music هتقدر تنزل مئات الأغاني وتسمعهم من غير ما تضطر تكون متصل بالإنترنت.
في تصريح صحفي، هشام الناظر، مدير Google في مصر قال: “لأكثر من عقد من الزمن، يزور الملايين من الناس في العالم العربي تطبيق YouTube لمشاهدة الفيديوهات والتعلم والاستماع للموسيقى. وتعتبر الموسيقى ثاني أكثر الفئات شعبية على YouTube، وهي في نمو مستمر. ونحن متحمسون لإطلاق منصة YouTube Music التي ستمنح المستخدمين إمكانية الوصول إلى المكتبة الموسيقية الواسعة على YouTube، وستساعدهم في العثور على الموسيقى التي يحبونها من الإصدارات الجديدة إلى الأغاني الكلاسيكية الشهيرة والأغاني الرائجة والعروض المباشرة. كما أننا متحمسون أيضًا لإطلاق منصة YouTube Premium، وهي خدمة اشتراك مدفوعة تسمح للمستخدمين بمشاهدة الفيديوهات من دون إعلانات على YouTube وبما يشمل ميزات رائعة مثل المشاهدة دون اتصال بالإنترنت ومواصلة تشغيل الفيديوهات حتى عند استخدام تطبيقات أخرى، وغيرها الكثير”.
أما ليليانا ابو دلو، مديرة برنامج الشراكات الموسيقية في الشرق الأوسط وشمال أفريقيا عند YouTube صرحت بـ: “نحن فخورون جداً بالتاريخ الموسيقي الغني لمصر المتواجد على YouTube، و متحمسون لجعل هذا المحتوى أقرب لقلوب المستخدمين عبر منصة و تطبيق YouTube Music. على مر السنين، لعبت منصة YouTube دوراً مهماً في نجاح شركات الإنتاج العربية والفنانين العرب في المجال الرقمي. وصممنا تطبيق YouTube Music لمساعدة الناس على الاستمتاع بالموسيقى التي يحبونها سواء كانت إصدارات رسمية أو فيديوهات موسيقية شهيرة، ومساعدة الفنانين أيضاً على الموصول لمحبينهم بطريقة ثلثة وأسهل.”