متحف السينما: مشروع طلابي هيفتح أبواب جديدة لمحبي السينما المصرية

0

مع نهاية السنة الدراسية، بتظهر مشاريع تخرج طلاب الجامعات اللي بتكون مليانة بالأفكار الجديدة اللي تقدر تشكل نواة لمشاريع مؤثرة وناجحة على أرض الواقع. واحد من مشاريع التخرج اللي ظهرت السنة دي هو مشروع “متحف السينما المصرية” اللي بيهدف لإطلاق أول متحف تفاعلي للسينما في مصر والشرق الأوسط.

المشروع ده فكرة وتنفيذ ثمانية من طلاب الإعلام في جامعة مصر الدولية، والطلبة دول عاوزين يدخلونا ورا الكواليس بتاعة المشاريع الفنية اللي بنفتكرها كلنا في فترة من فترات حياتنا، وهما كمان عاوزين يلقوا الضوء على إبداعات الإنتاج السينمائي في مصر على مر العصور.

Welcome on board

Take a tour down your memory lane and remember The magic of movies! Movies have been part of our lives since 1896. Now is the time to celebrate the ones who created this magical experience… tune in! 📽️من ١٨٩٦.. اصبحت الافلام جزء من حياتنا… جيه الوقت اننا نقدر صناع السينما اللي كان ليهم الفضل في ابتكار هذا الخيال الجذاب .. #كلاكيت_أول_مرة #انت_اللي_تقول_أكشن

Posted by ‎The Egyptian Cinema Experience متحف السينما المصرية‎ on Tuesday, June 2, 2020

إحنا اتكلمنا مع الطلبة اللي ورا المشروع ولما سألناهم عن سبب اختيار الفكرة دي قالولنا ” أفلام كتير في السينما المصرية فيها أبداعات واحنا مش عارفين عنها حاجة، فقررنا نبرز كل الحاجات ديه في متحف تفاعلي للسينما. بمعنى من أول ما تدخلي المتحف لحد ما تطلعي وأنتِ بتتكلمي مع ممثلين، ممكن تلبسي لبسهم، تسمعي صوتهم، تعرفي تاريخ، وتتعلمي حاجة جديدة.”

مصر فيها أكتر من متحف لفنانين بعينهم أو لأعمال ومعدات فنية معينة زي مثلاً معرض فاتن حمامة اللي تم افتتاحه في مكتبة الاسكندرية سنة 2017، ومتحف قصر السينما في القاهرة اللي أسسته وزارة الثقافة المصرية سنة 2019، بس المختلف في فكرة الطلاب دول هو اعتمادهم الكبير على التكنولوجيا ووسائل التسلية الجديدة في الوصول للجمهور بتاعهم على اختلاف أعمارهم، وبالتالي هتختلف تجربتهم عن أي جولة تقليدية في متحف من المتاحف العادية. كمان المتحف هيضم ورش فنية في عناصر الانتاج السينمائي المختلفة علشان تكون التجربة كاملة من كل الجوانب.

موسيقى تصويريه

Confused yet? Sound on, listen carefully, Feel familiar? Time to guess the name of the movie featuring this soundtrack… 🎶 Let’s go! Soundtracks give an extra flavor to each movie and it’s time to showcase these hidden talents behind movie makingمتلخبط؟ شغل الصوت و اسمع كويسخمن اسم الفيلم اللي بيحتوي على الموسيقى التصويرية ديه🎶الموسيقيى التصويرية بتضيف نكهة لكل فيلم و جيه الوقت إنك تشوف كل المواهب المخفيه وراء صناعة الأفلام.#كلاكيت_أول_مرة #انت_اللي_تقول_أكشن#cinema#egypt#egyptian#egyptiancinema

Posted by ‎The Egyptian Cinema Experience متحف السينما المصرية‎ on Friday, June 12, 2020

الطلاب بدأوا تطبيق فكرتهم من على السوشيال ميديا بمجموعة من الألعاب والبوستات التفاعلية اللي هتشد انتباهكم وتخليكوا تحبوا تعرفوا أكتر عن تاريخ إبداعتنا السينمائية زي إنهم مثلاً بدأوا يستخدموا تقنيات تلوين الأفلام الأبيض وأسود، وبدأوا يلقوا الضوء على أهمية الموسيقى التصويرية في الأفلام بطريقة مختلفة عن طريق تركيب تراكات الموسيقى المشهورة على فيديوهات لمناظر طبيعية علشان نحس بتأثيرها على المشاهد اللي بنشوفها ونفتكرها بمنظور جديد.

هما دلوقتي في تواصل مع الجهات المعنية في وزارة الثقافة علشان يحققوا حلمهم على أرض الواقع. ولما سألناهم عن خطتهم للفترة الجاية، قالولنا إن كل اللي طالبينه من الناس هو دعمهم للفكرة وتفاعلهم معاها لأنه بنجاحها على السوشيال ميديا هتقدر توصل لجدران المتاحف.

آخر كلمة: العالم كله فيه أربع متاحف تفاعلية بس للسينما، تفتكروا المتحف الجاي هيكون في مصر؟

تعليقات
Loading...