بعد إجراء عملية دقيقة بالأنف: تطورات الفنانة حورية فرغلي الصحية

لفترة كبيرة كلنا تابعنا مشكلة الفنانة حورية فرغلي بسبب أنفها، اللي تسببت لها في مشاكل صحية وكمان نفسية بسبب التنمر اللي كانت بتواجهه بسبب شكلها بعد كسر أنفها.. وبسبب إن نجاح العمليات مش مضمون وكمان مشاكل الطيران لفترة طويلة بسبب ظروف كورونا، كان كل شوية ميعاد العملية الجراحية اللي المفروض تعملها حورية بتتأجل، ولكن أخيرًا عملت أول عملية، وكمان ظهرت حورية بتسجيل صوتي بتطمن فيه الناس على حالتها الصحية.

خلال التسجيل الصوتي قالت حورية إنها عملت عملية استمرت لـ 9 ساعات، وإن العملية كانت صعبة ولكنها قدرت تجتازها وتتحمل الألم، وإنها كمان بتخضع لجلسات أكسجين زيّ ما قال الطبيب علشان تستعد لإجراء عمليتين تانيين لترميم الأنف، وخلال العملية تم استئصال جزء من عظام القفص الصدري وخلايا من فروة الرأس علشان تتزرع في الأنف، والمفروض إن حورية تخضع لـ 20 جلسة أكسجين علشان يتم تنشيط الخلايا المزروعة في الوجه.. وبعد ما تعمل العمليتين المفروض إنها ترجع مصر.

وكان باين من خلال التسجيل الصوتي إنها سعيدة جدًا بالاهتمام والدعم وكمان الدعوات اللي بتوصلها من الناس، خصوصًا إنها من فترة كانت طلعت وقالت إنها بتمر بحالة نفسية سيئة لإنها وحيدة ومحدش بيسأل عليها، ولكن دلوقتي الوضع اتغير وبقى في اهتمام كبير من الجميع، سواء من فنانات من الوسط الفني أو حتى من الناس العادية.

آخر كلمة: بنتمنى للفنانة حورية فرغلي الشفاء العاجل!

تعليقات
Loading...