شوفنا صور كتير من النجوم والمشاهير اللي بنحبهم على انستجرام وهما مغميين عيونهم وكاتبين هاشتاج خلاويص، الموضوع ماكنش صورة واحدة، وفي الأول افتكرناه دعايا لفيلم أو مسلسل جديد لأحد النجوم، لكن مع تكرار نفس نمط الصور وبنفس مشاركة الهاشتاج لأكتر من نجم في نفس الوقت خلانا نتسائل، وعرفنا إيه الحكاية.
مبادرة خير جديدة من مؤسسة مصر الخير، انتشرت على السوشيال ميديا في الساعات اللي فاتت، بتهدف لمساعدة خروج الغارمات من السجون ورجوعهم لحياتهم ولأهلهم، ودي حاجة لمستنا كلنا إنسانيًا لإن مساعدة أمهات كتير انتهى بيهم الحال في السجون بسبب ديون عليهم كان هدفهم بيها مساعدة أسرتهم وأهلهم بفلوسها على المعيشة الصعبة دلوقتي، ده سبب مهم يخلينا نتضامن مع كل محاولات المساعدة والمبادرات اللي بتهتم بحاجة زيّ كده.
اقرا كمان: #سكوب_أمل: مبادرة “كل نور بيفرق” لدعم المكفوفين فى أزمة الكورونا.
من نجوم الفن لمشاهير الإعلام ولاعبي الكورة اللي بنحبهم، كتير منهم ساهم في المبادرة وشارك على هاشتاج خلاويص الخاص بيها لنشر المبادرة على أكبر نطاق ممكن، وكل فنان بيشارك بصورته بيساهم كمان في نشر المبادرة عن طريق إنه يعمل منشن لفنانين تانيين يشاركوا في التحدي، كلهم هدفهم مساعدة ستات كتير وأمهات في إنهم يرجعوا لحياتهم تاني.