انتشرت الفترة اللي فاتت صور على السوشيال ميديا لشاب لابس بدلة باتمان بيتجول بعربيته في شوارع القاهرة، والناس صورته وشاركت الصور على المواقع وخدوها بهزار وماكناش عارفين إيه سبب ظهوره باللبس الكامل للشخصية وكمان العربية الخاصة بتاعته، دلوقتي عرفنا إنه شاب قرر يوعي الناس بضرورة المحافظة والالتزام بالإجراءات الاحترازية لمواجهة انتشار فيروس كورونا، إزاي ده حصل؟
بعد الظهور الغريب ده، اكتشفنا إن ورا الموضوع ده باسم رؤوف، عمره 28 سنة، قرر يلف شوارع القاهرة بعربية باتمان وبيشاور للناس بسعادة ويتصور معاهم، وبسبب أحداث جائحة كورونا، قرر باسم إنه يوزع كمامات مجانًا على الناس في الشارع، ويكلمهم عن أهمية حماية نفسهم وغيرهم من الفيروس.
باسم اختار شخصية باتمان لحبه الشخصي ليه أولًا، وكمان لإنه شخصية محبوبة للأطفال والكبار، وده هيخليه يقدر يساعد في التوعية بشكل مقبول للناس وهتسهل عليه هدفه، خصوصًا إنه عايز يوصل للأطفال اللي بيحتاجوا قدر أكبر من التوعية دلوقتي، عن طريق إنه بيلف الشوارع بعربية أحلامه “عربية باتمان” وبينزل يوزع الكمامات على الناس.