انسانية في مواجهة كورونا: شاشات في مستشفى العزل لتواصل المرضى بأهلهم

لأول مرة، في مستشفى في ميت غمر، لفتة انسانية بتساعد المرضى على التعافي برفع حالتهم المعنوية والنفسية بإنهم يتواصلوا مع أهلهم وأصحابهم عن طريق شاشات في المستشفى، وفرتها وحدة الزيارة الإلكترونية والدعم النفسي لمرضى العزل، اللي تم إنشائها من وقت قريب، وقدم فرصة للأهالى إنهم يطمنوا على ذويهم في العزل عن طريق إنهم يتكلموا معاهم بالصوت والصورة إلكترونيًا.

الدكتور سعد مكي وكيل وزارة الصحة في الدقهلية، أكد إن الوزارة بتسعى دايمًا لخدمة المريض، والخدمة مش بس عن طريق توفير الأدوية والمستلزمات الطبية، لكن كمان تقديم الدعم النفسي للمرضى، بما إن فيروس كورونا بيسبب أثر سلبي ونفسي كبير جدًا على حالة المريض في العزل، وبتؤخر من شفاء المصاب، علشان كده جات فكرة تفعيل شاشات للتواصل بين مرضى عزل كورونا وأهلهم، لتحسين حالتهم النفسية.

وبعد تطبيق الفكرة، لاحظوا إن الشاشات دي ساعدت على تحسين الحالة المزاجية للمرضى، وبالتالي ده هيساعد على سرعة الشفاء وارتفاع نسبته، وده سبب رغبة لتعميم نظام الشاشات الإكترونية بكل مستشفيات محافظة الدقهلية، علشان يدوا للمرضى شعور بالأمان والاطمئنان في العزل والوحدة اللي بيسببها، وفعلًا بنتمنى الفكرة دي تبقى في كل مستشفيات العزل على مستوى الجمهورية، لإنها هتفرق في مواجهة فيروس كورونا اللي طوّل معانا وبقى دمه تقيل.

آخر كلمة: ماتفوتوش قراءة: دكتور بيعزف موسيقى لمرضى الكورونا في مستشفى العزل

تعليقات
Loading...