بعد بتر قدمه، حاجات مانعرفهاش عن شريف الدسوقي “سبعبع”

كان مجرد ظهوره على الشاشة بيضحكنا، شريف دسوقي المشهور بلقب “سبعبع” واللي أول لما طلع في مسلسل “بـ 100 وش” عمل حالة غريبة عند الجمهور بالـ character بتاعته، وبطريقته في التمثيل وأسلوبه لما بيرمي الإيفيه.

النهارده شوفنا الفنان اللي قدر يضحكنا بيمر بأصعب موقف ممكن أي حد يمر بيه في حياته، هو فعلًا صح المقولة اللي بتقول “إن أكتر ناس بتضحكنا هي بتبقى أكتر ناس مهمومة وشافت في حياتها.” وافتكرنا بعدها نهايات مأساوية لفنانين كوميديا زيّ اسماعيل ياسين وزينات صدقي اللي اتوفت فوق سطح بيت وماكانش معاها أي فلوس والغريب برضه إن “سبعبع” خريج نفس مدرسة التمثيل بتاعتهم.

شريف الدسوقي بعد إصابته أخر فترة بأمراض كتير واللي منها مرض السكر، وبسبب وجود جرح كبير اتعرضله في قدمه خلال تصوير فيلم “وقفة رجالة”، وبعد ما اتطورت حالته ووصل الجرح لعمق أكثر من 7 سنتيمتر، الدكاترة مالقوش حل غير بتر قدمه، علشان ينقذوا حياته لإن المضاعفات كانت ممكن توصل لحد الوفاة.

دي أبرز معلومات جبناها عن شريف الدسوقي “سبعبع” علشان الناس تفضل فاكراه وماتنساش

  • شريف الدسوقي مش بس ممثل، ده كمان حكاء ومؤلف، اتولد في اسكندرية وعنده 53 سنة.
  • شارك في بعض الأفلام القصيرة في بداية حياته الفنية.
  • اتصاب خلال 11 يوم بأمراض منها الضغط والسكر.
  • دخل مصحة نفسية وزار طبيب نفسي بسبب انفصاله عن زوجته من 20 سنة.
  • اتعرض لأزمات مالية كتيرة وكان بيدخل بسببها في نوبات بكاء هيستيرية واكتئاب.
  • هدد قبل كده بالانتحار في ميدان عام لو ماخدش تعويض مالي من أحمد الجنايني لإنه اتعرض للإصابة خلال تصوير الفيلم ولجأ وقتها لأشرف ذكي نقيب المهن التمثيلية علشان يجيبله حقه.
  • اشتغل في مهن كتير منها الحدادة وكان صياد.
  • والده كان مدير لفرقة اسماعيل ياسين المسرحية من 1948.
  • بالرغم إنه ماتخرجش من المعهد العالي للفنون المسرحية واتخرج من معهد فني صناعي، إلا إنه باجتهاده بقى مدرب للتمثيل في أكاديمية الفنون وعدد من الجامعات.
  • بعد ما اتكرم في مهرجان القاهرة السينمائي كأحسن ممثل، تم شن حملة هجوم ضده واتهموه بتعاطي الخمور وطلع نفى كل ده.

وبعد الحادثة المأساوية دي، ظهر دعم كبير من قبل الممثلين وعملوا هاشتاج اسمه “بنحبك ياسبعبع”، شريف الدسوقي أو سبعبع أو يا نجومية زيّ ما كان بيقول في المسلسل، بندعي إنه يعدي من الأزمة دي على خير بدون أي خسائر تانية.

آخر كلمة: ماتفوتوش قراءة: “الغرور مقبرة الفنان”: المخرجة كاملة أبو ذكري وهجومها على أبطال مسلسل بـ 100 وش

تعليقات
Loading...