أول حاجة بتشد في الفيلم هي عنوانه، لو عنوانه حلو هيعلم مع الناس حتى قبل ما يشوفوه ويعرفوا بيتكلم عن إيه، العناوين بشكل عام ليها أصول وقواعد ومن القواعد دي إنك تستخدم الرقم علشان تجذب الناس أكتر ودي قاعدة معروفة حتى في كتابة المقالات.
وبدأت فكرة استخدام الأرقام في عناوين الأفلام من زمان وكانت علامة مميزة وقت عرضها، علشان كده استمرت لحد دلوقتي فكرة استخدام رقم في العنوان. الموضوع مش بيمشي بالحظ أو البركة، لازم يبقى رقم ليه معنى وبيعبر عن حاجة جوا الفيلم.
أفلام بدأت أسمائها بأرقام
ولإن الأفلام اللي بدأت أسماءها بأرقام كتيرة ومن أيام الأبيض والأسود، جبنالكم 5 أفلام اتعملوا في فترة الألفينات.
678
فيلم بطولة نيللي كريم وناهد السباعي وبشرى، وماجد الكدواني بيتكلم عن قضية التحرش في مصر من خلال تلات قصص، وبعدها يقرروا ينتقموا من المتحرشين في الأتوبيسات وكان أحد الأتوبيسات كان بيحمل رقم 678، واللي اتسمى عليه اسم الفيلم.
ساعة ونص
فيلم بطولة مجموعة كبيرة من الفنانين منهم: محمد إمام وماجد الكدواني وأحمد الفيشاوي وسمية الخشاب وسوسن بدر وإياد نصار و محمد رمضان، فيلم بيتكلم عن حادثة من حوادث القطر الشهيرة واللي بتحصل كل فترة، عمل ضجة وقت عرضه وكان مليان بالمشاهد المؤثرة والحقيقية، وكان ساعة ونص ده الوقت اللي هياخده القطر علشان يوصل، وفي الأخر طبعًا ماوصلش.
الثلاثة يشتغلونها
فيلم كوميدي بطولة ياسمين عبد العزيز وصلاح عبدالله وهالة فاخر، للوهلة الأولى تعرف إنه مستوحى من فيلم الثلاثة يحبونها بطولة سعاد حسني، الفيلم بيحكي عن تلات شباب استغلوها بطرق مختلفة.
8\1 دستة أشرار
فيلم بطولة ياسمين عبد العزيز ومحمد رجب وخالد صالح ونيكول سابا، بيتكلم عن عصابة محترفة لعمليات النصب والسرقة ولكن الفيلم بيتقدم في إطار كوميدي خفيف، وعن اسم الفيلم هو عدد أفراد العصابة 4 أفراد.
واحد – صفر
فيلم بطولة نيللي كريم وخالد أبو النجا وإلهام شاهين وأحمد الفيشاوي ومجموعة كبيرة تانية، بتدور أحداث الفيلم خلال يوم واحد عن قصص واقعية لمشاكل من طبقات وفئات مختلفة، وكل ده بيتعرض وبيتناقش خلال يوم ماتش مصر في بطولات الأمم الأفريقية، واللي انتهى بفوز مصر “واحد- صفر”