وجود ملجأ للمرأة ضد العنف الزوجي ممكن يغير كتير.. إيه اللي ممكن يساعد فيه؟
بواسطة: ساره علي
هتحس بإيه لما كل ثانية بتعدي عليك فيها خوف وعدم أمان؟ حتى وأنت نايم في بيتك. العنف مش مجرد ضرب، ممكن إساءة بكلام مؤذي نفسيًا أو عنف جنسي. وخوفك مش بيقتصر على نفسك علشان لو عندك أطفال، فهما كمان معرضين في أي لحظة للعنف سواء كان نفسي أم بدني. وبحسب إحصائيات منظمة الصحة العالمية إن واحدة من كل تلات نساء يعني 30% من أنحاء العالم بتتعرض في حياتها للعنف البدني أو النفسي أو الجنسي.
يعني إيه ملجأ للمرأة؟ هو مكان بيستضيف المرأة بشكل مؤقت بعد هروبها من العنف. كمان بيحميها وبيقدم لها الدعم النفسي ضد العنف اللي له أشكال كتير زيّ الضرب أو سوء المعاملة والأذى الجنسي زيّ الاغتصاب حتى لو من الزوج.
إيه الطرق اللي بيتبعها الملجأ علشان يساعد السيدات ويحميهم؟
الملجأ بيشكل الحماية الكاملة للسيدات وللأطفال، وعلشان كده من الشروط إن العنوان بيكون سري ومش مسموح لأي حد إنه يعرفه حتى أهل المتعرضين للعنف. كمان بيساعد على ضمان حقوق المرأة وحمايتها ومساعدتها في رفع قضايا الطلاق لو ده طبعًا من اختيارها، والتهيئة للحياة ما بعد الطلاق. بيبدأ الملجأ باستقبال المرأة وبيسألها عن أسباب الهروب ولو محتاجة رعاية صحية. الملجأ بيوفر مكان للمعيشة، الأدوية والأكل واللبس. وكمان الدعم النفسي عن طريق جلسات نفسية بين السيدات. وطرق حياتية بتأهلهم للوثوق مرة تانية من نفسهم. ومش شرط يكون عندك أطفال علشان تستفيدي من الحماية اللي بيقدمها الملجأ، فهو لكل مراة تعرضت لعنف أو إساءة.
ازاي وجود الملجأ ممكن يقلل العنف الزوجي؟
وجود العقاب ممكن يساهم في تقليل العنف. الملجأ بيساعد السيدات ويشجعهم ياخدوا خطوة للدفاع عن نفسهم بشكل قانوني، وده طبعًا بيسبب الخوف والقلق للشريك من العقاب اللي هيقع عليه، سواء كان بالسجن أو الغرامات أو الحرمان من حضانة الأطفال. ومع وجود العقاب وعدم الاستهتار بالموضوع، الزوج هيفكر كتير قبل أي فعل ممكن يؤذي المرأة جسديًا أو نفسيًا. وبوجود الملجأ، فمفيش ضرورة للاستمرار في علاقة، أو بيت بتتعرضي فيه للعنف.
الآثار الناتجة عن العنف المنزلي على السيدات والأطفال وازاي ممكن يتخطوا ده؟
كتير من السيدات المتعرضين للعنف الأسري بيفكروا في الانتحار وبيعانوا من الاكتئاب. يعني الآثار نفسية وبدنية وجنسية، زيّ حالات حمل غير مرغوب أو حالات إجهاض أو ولادة مبكرة بسبب الاغتصاب الزوجي. ده غير الإصابات الناتجة عن الضرب، وعدوى الأمراض المنقولة جنسيًا. أما احتمالية الإصابة بالاكتئاب أو التفكير في الانتحار، فهي من ناتج الصدمة اللي بتتعرض لها المرأة، وده بيأثر بشكل كبير على النوم وبيسبب القلق والامتناع أحيانًا عن الأكل فبالتالي بيأثر على الصحة. كمان الأطفال بيتعرضوا لاضطرابات سلوكية وعاطفية, زيّ ارتكابهم للعنف أو التعرض له بسهولة وعدم الثقة بالنفس والاكتئاب. ده غير المشاكل الصحية زيّ سوء التغذية. مش بسهولة ممكن السيدات تتخطى الأزمة لكن مش صعب مع الدعم النفسي والاجتماعي. وأول خطوة علشان تكوني كويسة إنك تقولي لأ لأي حد بيعرضك لأذى نفسي أو بدني أو جنسي. ومع محاولة التعايش بطريقة سليمة بعيدة عن الإهانة، ده بيساعد على رجوع الثقة بالنفس واحترام الذات، وبالتالي هتقدري تساعدي طفلك وتسمعيه. طبعًا الجلسات النفسية مهمة ليكي ولطفلك علشان تتخطي الأزمة وتبدأي حياة جديدة.