اعتمدت “منظمة الصحة العالمية” أول لقاح مضاد للملاريا؛ ومنحت الضوء الأخضر لتوزيع أول حقنة منقذة للحياة على نطاق واسع. وقررت المنظمة إصدار اللقاح باسم”موسكيريكس” (Mosquirix) واللي أثبت فعاليته في التجارب السريرية بنسبة 56% على مَدار 12 شهر من التجارب السريرية.
أعلنت منظمة الصحة العالمية إن اللقاح يعتبر وسيلة مفيدة لمكافحة مرض الملاريا لكنه مش هيلغي ضرورة سُبل الوقاية التانية.
حقائق رئيسية بخصوص مرض الملاريا
هو مرض فتاك بتسبّبه طفيليات بتنتقل للبشر من خلال لدغات انواع من الناموس بتكون حاملة للعدوى. ورغم إننا ممكن نوفر بعض الوقاية من المرض وإن الشفاء منه ممكن من خلال مجموعة من الأدوية، إلا إنه مرض خطير جدًا وسريع الإنتشار وبيسبب وفيات كتير جدًا، خصوصًا في أفريقيا.
دراسات منظمة الصحة العالمية في 2019 أظهرت إن في 228 مليون حالة إصابة بالملاريا في جميع أنحاء العالم. وأظهرت النسب في نفس السنة إن العدد التقديري لحالات الوفاة بسبب الملاريا وصل لأكتر من 409,000 حالة وفاة.
أفريقيا هي أكتر قارة المرض ده منتشر فيها، وبيسبب أزمات إنسانية معقدة جدًا في الإقليم الأفريقي. في سنة 2019 كانت نسبة الإصابة بالملاريا في أفريقيا ونسبة الوفيات فيها هي 94% من مُجمل حالات الإصابة بالملاريا والوفيات في العالم كله.
والمرض بيهدد الأفراد اللي مناعتهم ضعيفة زيَ الأطفال والمصابين بمتلازمة نقص المناعة البشرية المكتسبة “الأيدز”، والدراسات اللي عملتها منظمة الصحة العالمية أثبتت كمان إن العُمال الأجانب المهاجرين بيكونوا أكثر عرضة للموت من المرض بسبب ضعف مناعتهم.
والمرض بيسبب ارتفاع شديد في درجة الحرارة بعد 10 أيام لـ 15 يوم من لدغة الحشرة الحاملة للمرض، وممكن يسبب الموت خلال 24 ساعة لو وصل لحالة خطيرة وماتلحقش بالعلاج السريع.
أول لقاح ضد مرض طفيلي في العالم
موسكيريكس مش أول لقاح ضد الملاريا بس، لاء ده أول لقاح من نوعه بيشتغل على مرض طفيلي، وده هيفتح الباب للدراسات الطبية علشان تطلع لنا أنواع أدوية جديدة ولقاحات جديدة مش بس ضد أمراض طفيلية، ده كمان ممكن يسبب ثورة في علاج أمراض تانية مستعصية.
والجدير بالذكر إن الدراسات اللي اتعملت على فيروس الكورونا واللقاحات بتاعته ساعدت كتير في ظهور لقاح موسكيريكس ونجاحه في التجارب السريرية.