علشان مع الوقت يصبح زيّ أي مرض متعايشين معاه وله أدوية وعلاج، فيروس كورونا في طريقه لإنه يمحي الذعر والقلق عن العالم كوباء صعب السيطرة عليه، ودلوقتي بعد موافقة هيئة الدواء المصري ومنح تصريح طوارئ للدواء، هيتم تصنيع أول دواء للعلاج عن طريق الفم، لعلاج فيروس كورونا، وهيتم تصنيعه في واحد من مصانع الأدوية المصرية، بمواصفات جودة ألمانية، لتصنيع وإنتاج عقار دواء “هوكستربريفر” اللي بيعالج فيروس كورونا في 5 أيام بس!
التصنيع هيتم في خلال الفترة اللي جاية، وده بالتزامن مع إطلاق الدواء نفسه في المملكة المتحدة بعد اعتماده من وكالة الأدوية البريطانية، وكمان حجز الولايات المتحدة الأمريكية لجرعات من الدواء بمبلغ 1.2 مليار دولار، واليابان حجزت جرعات 1,6 مليون جرعة بمبلغ 1.1 مليار يورو، وأستراليا وسنغافورة وكوريا الجنوبية قاموا باتفاقيات شراء مماثلة.
عملية تصنيع دواء هوكستربريفر لعلاج كورونا هتكون تحت رقابة ومراجعة من خبراء هيئة الدواء المصرية، لضمان سلامة وفاعلية الدواء بشكل كامل، وكمان شركة ميرك الأمريكية بتأكد إن العقار الجديد بيحتوي عليه ملف أمان نظيف، لإن الدواء اللي بتنتجه يؤخذ عن طريق الفم، والناس هتقدر تتناوله في منازلهم بكل سهولة.
تصنيع الدواء الجديد في مصر بالتزامن مع طرحه في إنجلترا وأمريكا يعتبر حدث فارق، كون العلاج أصبح دواء فموي يعالج كورونا في أقصر وقت ممكن، وبيدخل ضمن مضادات الفيروسات اللي هتقدر تحَد من قدرة الفيروس على التكاثر وبالتالي إبطاء المرض والقضاء عليه.