بنفرح لما نشوف نماذج ناجحة وتشرف علشان نتكلم عنها ونطلعها للناس، نماذج إيجابية تستحق إن الناس تركز عليها وتدي لها حقها وتبقى حديث السوشيال ميديا، بدل ما نقعد نعلي وندي قيمة للنماذج السلبية بكلامنا عنهم وإنهم يبقوا تريند أو غيره، في شخصيات تانية تستحق تبقى هي التريند! ومن ضمن الشخصيات دي هي المذيعة آية جلال لإنها أول مذيعة مصرية محجبة تظهر على قناة أمريكية وكل الصحف والمواقع كانت بتتكلم عنها واتصدرت مواقع البحث والناس كانت عايزة تعرف مين هي ومسيرتها المهنية كانت عاملة ازاي.
عن مشوارها المهني
آية اتخصصت في الصحافة والعلوم السياسية في جامعة كوينيبياك بـ “هامدن” الأمريكية. وبتتقن الإنجليزي والفرنساوي مع العربي، واشتغلت كصحفية ومنتجة نشرات، وأخدت جائزة الإنجاز الأكاديمي من جمعية الخريجين لتفوقها في دراستها. واشتغلت كمساعدة إنتاج في شركة للإنتاج، وساعدت في تحرير مشاريع الرسائل لموقع كوينيبياك على الويب ومنصات الوسائط، واشتغلت كمديرة الويب لتليفزيون Q30 وكتير كانت بتشتغل في مجال تقديم التقارير والإرسال ونشرات الأخبار. وأخر حاجة قبل ما تبقى مذيعة هي المراسلة الصحفية.
بس طموح آية كان أكبر من كده، كانت بتحلم إنها تطلع وتظهر وماتبقاش خلف الكواليس ويبقى لها رأي وصوت، بس كان دايمًا عندها تخوف إن المجتمع الغربي هيتقبلها ولا لأ وهي محجبة! وقالت في حوار صحفي إن “بيتم تشويه صورة المسلمين في وسائل الإعلام. وإن في كتير من المفاهيم الغلط عن المسلمين” وده خصوصًا بعد أحداث 11 سبتمبر اللي خلت عرب ومسلمين كتير يتعرضوا للإضطهاد على خلفية الأحداث دي.
بس اللي حصل كان عكس توقعاتها، ووقت لما أعلنت عن منصبها الجديد لقت دعم وترحيب غير عادي من الناس اللي حوليها في الولاية ومن أصدقائها في نفس المجال، وعبرت بعدها عن فرحتها بالدعم اللي لاقته وبمنصبها الجديد، لإنها حست إن في مكانها المهم ده هتبقى صورة وصوت لناس كتير في الولاية وبرا الولاية كمان، وإنها بدورها هتقدر تغير نظرة المجتمع عن أفكار كتير ومفاهيم غلط كبروا واتربوا عليها عن المسلمين.
والجدير بالذكر آية ظهرت لأول مرة لها كمذيعة على شاشة WFSB التابعة لشبكة CBS الأمريكية واللي بتذاع في ولاية كونتيكيت واحدة من الولايات هناك، وأول ظهور لها كان يوم السبت اللي فات وهي بتقوم بالتغطية الإخبارية للقناة.. مبروك لآية!