ضجة كبيرة وزلزال معلوماتي حسب ما وصفته أكبر مجلة بحثية في مجال الطاقة عالميًا، وده بسبب أول قاعدة بيانات علمية بتمثل دليل شامل للباحثين في مجال الطاقة المتجددة وخصوصًا الطاقة الشمسية، والمثير للفخر في الموضوع هو إن المشارك في الإنجاز العلمي واحد من الباحثين المصريين وهو محمود الدماصي.
وفي حوار للباحث المصري الشاب مع سكاي نيوز، قال إنهم في الوقت الحالي شغالين على تطوير نوع جديد من الخلايا الشمسية، اسمه “بروفسكايت” ورغم إنهم اكتشفوا خواصها الكهروضوئية في منتصف القرن اللي فات، بس كان أول تطبيق لها في مجال الخلايا الشمسية سنة 2009 وفي خلال سنين قليلة كفائتها اتخطت تقنيات تانية كان بقالها نص قرن بيحاولوا يطوروها!
والسبب الأساسي اللي خلاهم يهتموا بالنوع ده من الخلايا هو خصائص المواد المصنعة لها، بشكل يتيح لك قدرة في تغيير كل خواصها وتعديل تركيبها الكيميائي، بحيث تمتص جزء معين من طاقة الشمس بكفائة عالية، وممكن كمان يتم طباعتها على الزجاج وتحضير مساحات كبيرة من الخلايا الشمسية عالية الكفائة في وقت قصير وبتكلفة عالية، وده مقارنة بخلايا السيليكون.
بس أكيد الموضوع ده له تحدياته اللي بتتمثل في عمرها الافتراضي اللي مابيتعداش خمس سنين، على عكس السيلكون مثلًا اللي عمره الافتراضي حوالي 20 سنة!
ونتيجة تركيز العلماء على النوع ده من الأبحاث وصلت عدد الأبحاث المنشورة حوالي 3 آلاف بحث سنوي في المجال ده، وده رقم كبير بيوضح مدى شغف الباحثين في دراسة النوع ده من الخلايا، بس المشكلة كانت بتكمن إن مع العدد المهول ده من الأبحاث، هيبقى مستحيل على الباحثين إنهم يتابعوا الكم ده ويكونوا على دراية باللي حصل في تخصصهم أو إنهم يتابعوا التطور العلمي.
وللسبب ده جات الفكرة اللي عملت “الزلزال معلوماتي” اللي اتكلمنا عليه فوق، فكرة إنشاء قاعدة بيانات عالمية مفتوحة المصدر والهدف منها تجميع البيانات المنشورة عن كل خلية شمسية، وفعلًا اقتنعوا الباحثين وكان من ضمنهم الباحث المصري الدماصي اللي شارك في إعداد قاعدة البيانات، وقدروا خلال فترة قصيرة إنهم يقرأوا أكتر من 20 ألف بحث منشور واستخرجوا حوالي 100 ألف معلومة عن كل خلية.
الدماصي باحث مصري من معهد البترول المصري ومعهد هيلمولتز برلين للطاقة والمواد بألمانيا، وحصل على بكالريوس العلوم في الكيميا سنة 2011، وبعدها ساهم كباحث مساعد في مجال الإضافات البترولية وفي فترة شغله قدر إنه يساهم في تطوير العديد من الإضافات الكيمائية وتطبيقها على بعض أنواع زيوت البترول الخام في مصر. محمد الدماصي نموذج يستحق إننا نتكلم عنه كونه جزء من الإنجار المعلوماتي ده.