فوق برج إيفل: هيفاء وهبي في بطولة فيلم كوميدي جديد

هيفاء وهبي هتبدأ تصوير مشاهدها الأولى من فيلمها الجديد “فوق برج إيفل” في أول شهر يناير اللي جاي، مع أبطال كتير منهم مصطفى خاطر ومحمد ثروت ومحمد سلام وحمدى الميرغنى. وهيتم تصوير أول مشاهد العمل فى فرنسا وبالتحديد في باريس العاصمة. الفيلم من إخراج أحمد خالد موسى وتأليف كريم حسن بشير، وبتدور أحداثه في إطار كوميدي اجتماعي.

آخر أفلام هيفاء وهبي كانت أشباح أوروبا اللي كان من المقرر إنه يتعرض في السينمات ولكن اتوقف وتم تأجيله أكتر من مرة بسبب أزمات كتيرة بين هيفاء وهبي ومدير أعمالها السابق ومنتج الفيلم محمد وزيري. ولحد ما نشوف فيلم فوق برج إيفيل في شاشات السينما، تعالوا نفتكر بعض أعمالها.

من أشهر المسلسلات اللي قدمتها هيفاء وهبي كان مسلسل كلام على ورق سنة 2014، اللي كان بيدور حولين جريمة قتل وشاركها فيه نجوم كبار زيّ ماجد المصري وأحمد زاهر وروجينا. وفي السنة اللي بعدها قدمت مسلسل مريم مع خالد النبوي، واللي كانت بتقوم فيه بدور بنتين توأم. شخصية منهم كانت طيبة والتانية نقيضها.

أما في سنة 2018، فشاركت في السباق الرمضاني بمسلسل لعنة كارما، كانت بتقوم فيه بدور ست محترفة بأعمال النصب والاحتيال، وبتوقع ضحاياها بجمالها، ولكنها بتقع في حب واحد من الضحايا.

بالنسبة للأفلام السينمائية، فمن الأفلام اللي قدمتها كان فيلم دكان شحاتة سنة 2009 مع عمرو سعد وفيلم حلاوة روح سنة 2014. والفيلمين أثاروا الجدل وقت عرضهم ولكن حققوا نجاح كبير.

آخر كلمة: ماتفوتوش قراءة: “الكبير الجزء السادس: ازاي أحمد مكي عمل ثورة في التلفزيون بشخصيات المسلسل؟” …

تعليقات
Loading...