نفسكوا تزرعوا في البيت ومش عارفين؟ جبنالكم مجموعة من النصائح لزراعة منزلية السليمة

بواسطة منة حسني.

من الحاجات المريحة للعين والأعصاب في أي بيت منظر الزرع الصغير المتعلق من الشباك أو البلكونة، ومش بس زرع الزينة اللي ممكن ينمو جوا بيوتنا، أنواع كتيرة من الخضروات، والفواكه، والأعشاب ممكن تتزرع جوا البيوت، وإحنا في المقال ده هنوريكوا إزاي..

الزراعة المنزليه من العادات المفيدة جدًا للأسرة، وأول فايده ليها هو دورها في تنقيه الهواء، وراحة العين، وكمان الإحساس بالانتعاش، وهي بتساعد على تحسين الطاقه العامه في البيت، غير إنها ممكن تكون عادة بيتجمع كل أفراد الأُسرة على ممارستها، والاستمتاع بيها.

طرق الزراعة المنزلية بتختلف من نبات للتاني، على سبيل المثال البذور أسهل المزروعات، علشان طريقة زراعتها بتكون عبارة عن رمي البذور في الطين المخصص للزراعة، والعناية بيها من حيث الريّ بانتظام في الأوقات المناسبة ليها، اللي بتكون في الغالب إما الساعات الأولى من الصباح أو المساء، وتعريضها للشمس، والتسميد.

وبالنسبة للزراعة بالشتلة، فهي برضه من أسهل طرق الزراعة، وهي عبارة عن زرع الشتلة في الطين، والعنايه بيها كل يوم. وكمان في الزراعة بالعقلة، ودي بتعتبر من أصعب الطرق، وبتحتاج متخصصين في الزراعة علشان تتنفذ بشكل صحيح، والنوع ده من الزراعة بيتناسب مع المساحات المنزلية الكبيرة زي الجنينة أو الروف.

أدوات الزراعة في البيت بسيطة، ومتوفرة في أغلب المشاتل، زي مثلاً الأحواض البلاستيكية، أو الخشب، وممكن يحل محلها أدوات منزلية قديمة ومركونة زي العلب البلاستيكية. والطمي المناسب للزرع، بيتنوع بين التربة الطينية، والرملية، والصناعية، وغيرها من الأنواع اللي بتتنوع في درجة خصوبتها ومناسبتها لأنواع النباتات المختلفة، وهي بتكون موجودة في كل المشاتل، وحوالين الشجر في الشوارع.

أما بقى السماد، فإحنا ممكن نصنعه في البيت من مكونات طبيعية زي تفل الشاي والقهوة، وكل ده بيعتمد على نوع النبات، ومقاس حوض الزراعة، وطرق العناية السليمة ليه.

آخر كلمة: متفوتوش قراءة عيادة النباتات: طبيب أردني ملى عيادته بمئات النباتات لأكتر من 35 سنة

تعليقات
Loading...
Tweet
Share
Share
Pin