انطلقت الدورة التانية من مهرجان البحر الأحمر السينمائي الدولي، اللي بيقام في جدة على الساحل الشرقي للبحر الأحمر، بحضور عالمي من صناع السينما الأهم في الشرق الأوسط وبوليوود وكل أنحاء العالم، وبينطلق في فعاليات مدتها 10 أيام لمحبي السينما وصناعها.
الحضور المصري في المهرجان ملفت وبارز، وكان على رأسه حدث جميل بتكريم الفنانة الكبيرة يسرا بجائزة فخرية، ده غير الحضور الفني لأفلام مصرية وصناع أفلام مصريين في المهرجان.
تكريم يسرا
الدورة التانية من المهرجان بتنطلق بتكريم الفنانة يسرا بجائزة اليسر الفخرية، لبصمتها الفنية الموجودة دايمًا في السينما المصرية والعربية وكمان في الدراما، وأعمالها اللي تنوعت بمناقشة قضايا كبيرة ومختلفة، وأثناء تكريمها اتكلمت عن حبها للمهرجان وسعادتها بالتكريم فيه، وتنبأت بدورة ناجحة لإن “الجواب بيبان من عنوانه” زي ما قالت.
وفي تكريمها، قال عنها الممثل العالمي شاروخان، إنها أيقونة حقيقية وأسطورة مصرية، وقال إن السينما بتمنح الناس السعادة، وبتعطي حياتنا الجمال وفرصة من خلال لغة نتكلم بها وقصص نتبادلها في كل أنحاء العالم.
الأفلام المصرية المشاركة
فيلم جنائن معلقة: ضمن مسابقة البحر الأحمر، بتشارك مصر في إنتاج الفيلم مع العراق وفلسطين والمملكة المتحدة والسعودية، وهو فيلم دراما، مدته 107 دقيقة، من إخراج أحمد ياسين الدراجي، وده هيكون العرض الأول في الشرق الأوسط وشمال أفريقيا.
وعن أحداث الفيلم، بتدور حول الأخين طه وأسعد، وسط ما بيحاولوا يكسبوا لقمة العيش من خلال جمع المعادن والبلاستيك من مكبّ النفايات الأسطوري الشهير باسم (جنائن بابل المعلّقة) في بغداد، بيلفت انتباههم مكبّ نفايات الجيش الأمريكي وبيلاقوا فيه دمية مطّاطيّة مهملة وبيقرروا ياخدوها، وبتدور الأحداث وبتختبر الدمية علاقة الأخين، اللي بيواجهها قلق بيهدد صلتهم الأخوية، لكن بتنتصر فيه روح الدعابة والبراءة.
فيلم كاملة: بيشارك الفيلم في مسابقة روائع عربية، والفيلم درامي مدته 97 دقيقة ومن بطولة إنجى المقدم، مي الغيطي، فراس سعيد، سلوى عثمان، لطفي لبيب، وسيناريو محمد عبد القادر وإخراج جون ساويرس، وده العرض العالمي الأول للفيلم.
أحداث الفيلم بتدور حول كاملة اللي بتشتغل دكتورة نفسية وتخطت الأربعين من عمرها، عزباء، وبتقضي وقتها بين رعاية والدها المسنّ ورعاية المرضى في عيادتها، وعلى الرغم من نجاحها المهني، لكن عمتها إنصاف مش بتعترف بيه، وبتحاول إجبارها على الجواز بشكل عشوائي.،وبعدها بتقابل يوسف الروائي الآسر، وعلى طول بتقع في غرامه، وفي نفس الوقت بتزورها مريضة جديدة شابة وفقيرة اسمها أسماء، مع معاناتها من اكتئاب حاد وصدمة شديدة بتسعى كاملة لاحتوائها، فبتتقلب حياتها رأسًا على عقب.
حضور الفعاليات
الفنانين المصريين حرصوا على حضور الدورة التانية من مهرجان البحر الأحمر السينمائي وبيشهدوا نجاحه، وشوفنا عدد كبير من الفنانين المصريين كان حضورهم قوي في فعاليات المهرجان وأيامه الأولى، زي حسين فهمي ولبلبة ونيللي كريم وبسنت شوقي ومحمد فراج وأمينة خليل، ده غير المخرج محمد دياب والمنتج محمد حفظي والناقد طارق الشناوي.
حتى في الاحتفالات كان توقيعهم وبصمتهم مميزة، وعلى رأسهم لبلبة ويسرا وأمينة خليل اللي شاركوا المطربة إليسا في حفلها، وانتشرت فيديوهات مرحة لهم أثناء الاحتفال.