من الروح الوطنية لتمكين المرأة.. ليه حفل نقل المومياوات كان مبهج بكل المقاييس؟

مفيش حد ماشفش حفل نقل المومياوات الملكية امبارح، اللي مش بس أبهر مصر والوطن العربي كله ولكن كمان الدول الأجنبية اللي أشادوا بعظمة المهرجان اللي حضره كبار المسؤولين ونقلته أكتر من 400 محطة فضائية علشان تتفرج عليه ملايين من الناس حول العالم.. حالة من الفخر عاشها كل مصري وهو بيتفرج على خروج 22 من مومياوات ملوك وملكات مصر القدماء فى موكب كبير من المتحف المصرى بالتحرير لحد ما وصلت لمقرها الجديد بالمتحف القومي للحضارة المصرية، ولإن كان في جوانب كتير جدًا إيجابية ظهرتلنا خلال الحفل، فحبينا نتكلم عن الأسباب الكتير اللي خليتنا نحس إن حفل نقل المومياوات الملكية كان “refreshing” للمصريين بكل المقاييس.

تعزيز الروح الوطنية

أد إيه كنا محتاجين الشعور ده ❤️🇪🇬

Posted by Mohamed Solaiman on Saturday, April 3, 2021

في الفترة الأخيرة حسينا إن كتير مننا كمصريين روحهم وانتمائهم الوطني زاد بنسبة ملحوظة بسبب الأعمال الفنية زيّ مسلسل الاختيار، وفيلم الخلية وغيرهم من الأعمال اللي كانت بتتكلم عن الإنجازات الوطنية وبتفكر كل الناس ليه مصر دولة عظيمة يفخر أي إنسان إنه يكون منها. وبعد حفل نقل المومياوات اللي فعلًا جيه في الوقت المناسب، نقدر نقول إن المصريين خدوا جرعة كبيرة من الوطنية تكفيهم لسنين قدام! لإننا لو هنتكلم عن أكتر التعليقات اللي حصلت على الحفل.. فهي جملة “فخور إني مصري”.

إبهار العالم

لو أي حد كان بيشكك في عظمة مصر وحاسس إنها أقل من أي دولة تانية.. فكل المعتقدات دي حرفيًا اتنسفت امبارح، بدون مبالغة العالم كله انبهر من حيث التخطيط والتنفيذ اللي كل تفاصيله كانت معمولة بدقة واحترافية على مستوى عالمي. فكتير من وكالات الأنباء الأجنبية كانت بتبث الحدث مباشر وعلق آلاف من الناس سواء جمهور عادي أو منظمات أجنبية، اللي أبدوا انبهارهم بالموكب.. وعلشان كده ماكنش غريب إن يكون هاشتاج #مصر تبهر العالم تريندج على تويتر، وهاشتاج #موكب المومياوات الملكية ترنيدج رقم واحد عالميًا!

الميمز

طبعًا جزء أساسي ومهم من أي حدث بيحصل، هو الميمز اللي بتتعمل عن الموضوع. وزيّ كل مرة الشعب المصري نجح إنه يطلعلنا كمية ميمز مختلفة من الحفلة، واللي خلانا نضحك من قلبنا. والميمز المرة دي كانت علشان تنشر الروح الإيجابية والسعادة على صفحات السوشيال ميديا وكأنها تكملة للاحتفال أو “after party”، وكل ده من غير أي تريقة أو تقليل من الحدث .. الـ perfect mix!

current mood :…

Posted by Mohra Mikhail on Saturday, April 3, 2021

لما حتشبسوت تشوف احمدعز وخالد النبوي وكريم عبدالعزيز

Posted by Outside. on Saturday, April 3, 2021

تمكين المرأة

بما إننا بنحاول الفترة دي إن إحنا ندعم المرأة ونعزز مكانتها في المجتمع بكل الطرق الممكنة، فجيه الحفل ده برضه في الوقت المثالي علشان يوصل رسالة للعالم كله عن قد إيه المرأة المصرية والعربية ليها دور مؤثر وفعال في أي حدث تاريخي. من أول العازفات الكبار اللي من غيرهم ماكنش هتطلع الموسيقى بالشكل اللي شوفناه، لحد الممثلات والمذيعات اللي كانوا بيمثلوا مصر بقوة وثبات.. النماذج المشرفة دول قدروا يرسخوا مكانة كل سيدة مصرية وعربية في المكانة اللي تستحقها.

آخر كلمة: فخورين بمصر وباستمرارها في صنع التاريخ!

تعليقات
Loading...
Tweet
Share
Share
Pin