من الحفلات للجيم: ثقافة التعرف على ناس جديدة في الشرق الأوسط

النهارده هو يوم المحادثات الجديدة، أو ببساطة فتح مناقشة جديدة مع حد ماتعرفوش، وقولنا نستغل المناسبة دي بإننا نتكلم عن ازاي نفتح مناقشة، أكيد بنحتاج نتعرف على ناس جديدة من وقت للتاني -إن ماكانش دايمًا- وبنحب نعرف قصص ونتناقش ونتكلم في مواضيع ونعرف وجهات نظر مختلفة، واحنا في الشرق الأوسط بنحب كده، وفي مصر بنشوف ده على أرض الواقع كتير، الناس بتحب تتكلم في الشارع، في المواصلات، على القهاوي، في المحلات وهما بيشتروا حاجات، مابيفوتوش فرصة للكلام والحكاوي، وده مش المصريين بس، معظم العرب عندهم الجانب الودود متأصل فيهم.

عن: good reads

لكن برضه ماينفعش تدخل فجأة كده بطريقة تخض اللي قدامك وتبقى مستني منه يتكلم وبفتح قلبه ويعتبرك صاحبه، برضه لازم يكون في مناسبة، في بوادر لأي مناقشة كده، ولازم اللي قدامك تلاقي منه إشارة إنه عايز يتكلم أو ييجي منه مناقشة، مش مثلًا واقف مكشر أو مش طايق نفسه.

ولو هنتكلم عن تكوين صداقات ومعارف، مش بس عن الكلام العابر مع أشخاص عابرين، فالموضوع دلوقتي أكيد بقى أسهل باستخدام السوشيال ميديا، اللي ممكن تخليك في أقصى الشرق وعندك صحاب في أقصى الغرب، في أخر الدنيا حرفيًا، بس أكيد اللي هيجمعكم هيبقى الاهتمامات المشتركة، في الفن أو في الحياة عمومًا.

السوشيال ميديا

من خلال الجروبات أو الصفحات اللي أنت بتهتم بيها، أيًا كانت اهتماماتك، لو بتحب الرياضة ووصفات فطار صحية والشوفان والموز وكده، Health Keepers هو الاختيار المثالي بالنسبة لك، أما لو أنت من الجانب الآخر من الكوكب، خُد الأتوبيس المقابل وروح على جروب كرش كيبرز، وصفات لكل ما لذ وطاب، وترشيحات لمطاعم، وصور هتتخنك من قبل ما تجرب الأكل اللي فيها حتى. في الجروبات هتلاقي ناس بتتناقش وتتكلم وتشارك آرائها على مواضيع مختلفة، ولو دخلت في مناقشة فيهم في تعليق مثلًا، ممكن ده يخليك تتعرف على ناس مختلفة. بس برضه خلّي بالك لإن السوشيال ميديا ليها جانب خفي سلبي، فهتلاقي ناس غريبة، ممكن ناس بتتعرف عليك لأغراض تانية، خلّي بالك.

النوادي

مش شرط تكون بتتمرن رياضة أو لعبة معينة، رغم إن التمرين هيعرفك على ناس كتير ويخلّي صداقتكم قوية كمان، بس حتى لو مش بتتمرن، ممكن تستغل النادي كمكان اجتماعي الناس بتروحه يقضوا وقت ويتعرفوا على بعض ويشوفوا أصحابهم، فممكن تستغل ده في إنك تبتدي تعرف ناس جديدة أو حتى تبتدي مناقشات في أي مواضيع بطريقة لطيفة.

الجيم

الجيم هيخليك تتعرف على ناس، وتفتح مناقشات، عن كل حاجة مش بس عن الرياضة واللياقة البدنية، مش بس الفورمة اللي هتخليكم تتكلموا، لكن بحكم وجودكم لوقت مش قليل مع بعض في نفس المكان، هتلاقي مواضيع ومناقشات كتير بتتفتح وتشارك فيها.

الحفلات والندوات

عن: ericsson

حفلات المزيكا بكل أنواعها، هتلاقي ناس بتشاركك نفس شغفك في المزيكا ونوعها، هتغنوا مع بعض وترقصوا، وممكن تفضلوا طول الحفلة مع بعض وكمان صداقتكم تكمل بعدها، ودي واحدة من ألطف الصداقات اللي بنقابلها لإنها بتبقى في الغنا والتنطيط ومود الحفلات الحلو ده. كمان ممكن مانخليش الموضوع مقتصر بس على حفلات المزيكا، الندوات الثقافية وحلقات المناقشة، زيّ الأنشطة اللي بتتعمل في ساقية الصاوي، لو مهتم بالأدب والثقافة ممكن تحضر الحفلات والندوات دي، وهتلاقي ناس بتشاركك نفس اهتمامك

الأنشطة التطوعية

عن: modo3

طبعًا مش هتلاقي أحلى من دي وسيلة تتعرف بيها على ناس، وهما في أحسن حالاتهم كبني آدمين وبيساعدوا غيرهم، بأي شكل سواء تجميع لبس وأكل وتوزيعهم على المحتاجين، أو أي أنشطة خيرية بتفضّل إنك تكون موجود فيها، الناس هناك بيكون عندها الاستعداد للمساعدة والمناقشة بلطف. ممكن تنضم لجمعيات خيرية معروفة، أو أنشطة على نطاق أضيق زيّ إنك تتجمع مع صحابك، وكل واحد فيهم يجمع أصحابه، وتروحوا تساعدوا بأي شكل تحبوه، هتتعرف على دواير أكتر وكمان هيكون موثوق فيهم لإنهم معارف أصحابك.

أخر كلمة: ماتفوتوش قراءة: في اليوم العالمي للنكتة: أصلها وفصلها ورحلة تطورها

تعليقات
Loading...
Tweet
Share
Share
Pin