سألنا خبيرة الموضة سارة أبو العلا.. ليه كل ما موضة تختفي ترجع تاني؟

في السنين الأخيرة كنا شاهدين على ظاهرة بتتكرر على طول سواء في الحياة العادية أو في عروض الأزياء وهي رجوع الموضة القديمة بشكل ملاحظ؛ موضة مر عليها عشرين وتلاتين ويمكن خمسين سنة وبدأت مصطلحات تظهر زيّ موضة تسعيناتي وتمنيناتي وغيرها. سألنا خبيرة الموضة، سارة أبو العلا، عشان نعرف ليه الموضة بتتكرر وترجع تاني كل شوية؟

خبيرة الموضة سارة أبو العلا

البحث عن مصدر للإلهام

معظم البشر بيدور على مصدر للإلهام طول الوقت، والموضة كمظهر للتعبير عن النفس ومجال مفتوح للإلهام حاجة مناسبة جدًا للتعبير عن ده، وهنا بيحاول ناس كتير استخدام ده علشان يعبروا عن نفسهم أو يستلهموا حالة أو زمن أو لوك لواحد مشهور في زمن سابق شايف إنه بيعبر عنه وعن جوانب في شخصيته، ومن هنا بيحاول البعض يبدع ويمزج بين موضات بتنتمي لعصور مختلفة في لبسه، بدايًة من الشكل لحد مزج الألوان.

عارضة الأزياء الشهيرة تويجي رمز الموضة في الستينيات – عن بينترست

الموضة بتتكرر كل فترة زمنية؟

خبيرة الموضة سارة أبو العلا قالت لسكوب إمباير إن الظاهرة يتاعة تكرار الموضة بتحصل كل فترة زمنية بتتراوح بين ٢٠ ل٣٠ سنة، وده بسبب التغيرات والفروق الزمنية الكبيرة بين الأجيال اللي بيلاقوا في الموضة القديمة اللي معصروهاش شيء جميل وملهم وجديد، ودي حاجة بتنطبق على مصممين الأزياء والناس العادية، فساعات مثلًا تلاقي بنت لابسة بنطلون أو جاكيت مامتها كشيء لطيف بتتباهى بيه كونه حاجة جديدة عليها تمامًا.

تأثير الأفلام

الأعمال الفنية عمومًا بتمثل مصدر إلهام لناس كتير وسبب رئيسي في رجوع موضات كتير من تاني، وحتى زمان ده كان بيحصل، في السبعينات مثلًا لما أتعرض فيلم The Godfather الشهير واللي بتدور أحداثه في السبعينات، عصابات المافيا رجعت تلبس لبس الفترة دي تاني، وده بيوضح تأثير الأفلام اللي بتنتمي لفترات زمنية مختلفة في الموضة العالمية.

مارلون براندو في دور فيتو كورليون بفيلم الأب الروحي بالبالطو الشهير للعصابات – عن بينترست

العولمة في غياب المضمون 

عيوب الرأسمالية والعولمة والضغوط اللي بيسببها المحاولات المستمرة للمكاسب المادية كلها من أسباب رجوع الموضة تاني، زمان كان فيه موسمين بس في السنة؛ الصيف والشتاء، والموضوع لما بقى مربح للشركات العالمية اللي دخلت بلفوسها في الاستثمارات بالماركات الكبيرة أتسبب في ضغوط على المصممين إنهم يعملوا مجموعات لتصميماتهم زيادة، فبقى في أربع مواسم في الأول، ودلوقتي زادوا أكتر ولقى المصممين نفسهم تحت ضغط البحث عن أفكار جديدة طول الوقت، وكان من ضمن الحلول دي إعادة تدوير موضات قديمة بشكل شيك.

أخر كلمة: ماتفوتوش قراءة: رحلة “الشعر الكيرلي” من التنمر للموضة

تعليقات
Loading...