مصر عملت أول وحدة بنك حيوي في منطقة الشرق الأوسط وأفريقيا

الجينوم المرجعي، مشروع تم الإعلان عنه في مارس 2021 في إطار توجيهات رئيس الجمهورية عبد الفتاح السيسي، والنهارده بنشوف خطوات ناحية المشروع قامت به القوات المسلحة، وهي إنشاء أول بنك حيوي Bio Bank أوتوماتيكي بالكامل في الشرق الأوسط وأفريقيا داخل مركز البحوث الطبية والطب التجديدي للقوات المسلحة، وده بالتعاون مع شركة أسكيون الألمانية وشركة ميرا لاب المصرية.

والبنك الحيوي أهميته بتتمثل إنه يقدر يخزن ويحفظ جميع أنواع العينات المستخدمة في البحث العلمي لسنين طويلة، وده هيساهم في تسهيل عملية دراسة العينات الحيوية من غير ما يبقى في خوف إن العينات دي تبوظ. إيه هو البنك الحيوي،؟ وإيه فكرة مشروع الجينوم المرجعي اللي بتعمله مصر؟

البنوك الحيوية هي مكان بيجمع الملايين من العينات البيولوجية اللي متاخدة من البشر والحيوانات والنباتات والميكروبات أو الكائنات الدقيقة، والعينات دي بتساعد في التشخيص الطبي والعلاج. التحدي كله بيتمثل في جودة العينات دي ومدى صلاحيتها في البحث العلمي؛ لو نتيجة كانت غلط، ده هيترتب عليه عينة سيئة الجودة، وبالتالي المريض هيتحرم من العلاج اللي يستحقه أو ممكن ياخد علاج مش هيفيده.

مشروع جينوم مرجعي للمصريين وقدماء المصريين

في مارس 2021، انطلق مشروع الجينوم المرجعي، وده بهدف رسم خريطة جينية مرجعية للشعب المصري، والخريطة دي بتتضمن تحديد المؤثرات الجينية في تأثير الأدوية وعلاج الأمراض المختلفة، ومش بس كده دي كمان بتساهم في تحديد العوامل الجينية اللي ممكن تأثر في الاستجابة لأسباب الأوبئة المختلفة. وده بشكل ما هيساهم في تفعيل الطب الشخصي والطب الدقيق، وهيساهم في تحديد الأشخاص الأكثر عرضة للإصابات الفيروسية واللي ممكن يتعرضوا لانتكاسات صحية كبيرة. ده غير إن المشروع بيهدف لدراسة الجينوم المرجعي لقدماء المصريين، والجينات اللي ليها علاقة ببعض الأمراض المزمنة زيّ أمراض القلب والأورام السائدة عند المصريين بجانب الأمراض الوراثية الشائعة عمومًا في مصر.

الأوساط العلمية والطبية بتعتبر مشروع الجينوم البشري واحد من أعظم الاكتشافات في التاريخ ومفيش مقارنة بينه وبين أي اكتشاف علمي تم على مر العصور؛ الناس بتعتبره رحلة اكتشاف لأسرار داخل الجسم البشري، وإنشاء أول وحدة بنك حيوي في مصر والشرق الأوسط يُعتبر خطوة مهمة في تنفيذ المشروع.

أخر كلمة: ماتفوتوش قراءة: حوارنا مع الدكتورة سارة مصطفى عن عملية تجميد البويضات

تعليقات
Loading...
Tweet
Share
Share
Pin