“قمصان مشجرة” في جدة: بيس كيك وجمهور جديد في السعودية
“صافي كتب أغنية الصيف” دي البداية.. بيس كيك بيقدموا أغنية في أخر الصيف، واحنا بنودّع أجواء البحر والصيف والقمصان المشجرة بنقوشات كتير كده، اللي مش بس بقينا بنحب نلبسها على البحر، لأ دخلناها العاصمة كمان، علشان نحس بجو الصيف واحنا حتى في الشغل يمكن يهوّن علينا.
أغنية الصيف من بيس كيك اختاروا لها اسم “قمصان مشجرة”.. بس ماتصورتش في الساحل الشرير ولا حتى الساحل الطيب، اختاروا يصوروها في جدة في السعودية، وفي الفيديو ظهرت أماكن سياحية مختلفة في جدة، واختلفت فئات الأماكن دي من أماكن تراثية وأماكن على البحر وأماكن جديدة علشان نعرف أكتر عن الأماكن اللي ممكن نروحها في جدة. وكمان لإن الرؤية الفنية لصافي والمخرج اعتمدت على الأماكن دي في جدة لإنها بتمثل كلمات الأغنية.
الأغنية كتب كلماتها وغناها أحمد صافي، والموسيقى إنتاج L5VAV، والفيديو كان من إخراج محمود أمجد. الفيديو بدأ التحضير له من شهر يونيو، لكنه اتصور في يومين بس في جدة.
وسبب اختيار جدة لتصوير الفيديو فيها هو إن بيس كيك بتتعاون مع مؤثرين على السوشيال ميديا من السعودية، ده غير إنهم بيقدموا صناعة المحتوى لعلامات تجارية سعودية كتير، فحابين يقربوا أكتر للجمهور السعودي علشان يشاركوا بشكل أكبر في المحتوى المختلف اللي بتقدمه بيس كيك.
الموضوع ابتدى برومانسية منسية، والحلقة اللي ظهرت فيها الفنانة السعودية، سارة طيبة، في حلقة منها، دي كانت بداية مشاركة الجمهور وصناع المحتوى في بيس كيك. وكان معاها في التحدي يحيى سعدي وأحمد صافي، وشوفنا كل مراحل التحدي اللي عارفينه من رومانسية منسية بس بطابع خليجي.
وبعدها كانت حلقة “امسك نفسك” اللي عملوها في شوارع السعودية، بتحدي “قلشات سمجة في الرياض” واللي هيخسر هيطلع “كوز” هنتفرج عليه وهو بيتحدف عليه كرات تنس.
بيس كيك هي شركة لصناعة وتقديم المحتوى على وسائل التواصل الاجتماعي، وبيتضمن المحتوى برامج
كوميدية على موقع يوتيوب ومنهم: رومانسية منسية، امسك نفسك، وغنيلي شكراً، اللي فاكر فاكر، ده غير المحتوى دعائي للشركات والعلامات التجارية. الشركة موجودة في مصر وتوسعت مؤخراً في الشرق الأوسط وشمال إفريقيا. ومن بين عملائها: MENA Netflix و MENA Spotify