مفيش شك إن الراب سين مشتعل الفترة دي، من أول البيف بين أبيوسف ومروان موسى واللي دخل فيه كمان تقريبًا نص نجوم الراب سين في مصر، لحد رجوع مروان بابلو، وكمان تحدي بين الفيشاوي ورمضان، لما نزل الفيشاوي أغنية نمبر 2، واللي من الواضح إنه مش هيخلص في أي وقت قريب.. لإن محمد رمضان نزل امبارح بليل أغنية جديدة بعنوان أنا البطل، اللي بغض النظر عن إنها كده كده هتبقى الـ hit الفترة اللي جاية وهنسمعها في كل الأماكن العامة، فهي كمان الأغنية كانت بتوصل رسائل واضحة زيّ معظم أغاني رمضان.
نشر امبارح رمضان أغنيته الجديدة “أنا البطل” على قناته الرسمية باليوتيوب، اللي ممكن نعتبرها مختلفة شوية عن بقية أغاني رمضان اللي اتعودنا نشوفها من حيث “طبيعة تصوير” الفيديو كليب.. فدايمًا كنا متعودين على ستايل معين لرمضان في الكليبات اللي معظمها بيكون في أماكن مفتوحة ومختلفة، ووجود backup dancers معاه في اللوكيشن.. لكن المرة دي، اكتفى رمضان بلوكيشن واحد بس طول الفيديو كليب، وهو غرفة مكتبه، وفي المكتبة وراه كل الجوايز اللي حصل عليها.. الرسالة واضحة مش كده؟ فطريقة رمضان في التعبير عن ثقته بنفسه، بتختلف من أغنية للتانية، ولكن الحاجة الثابتة هو اختياره لكلام أغانيه اللي كله بيتكلم عن فكرة إنه نمبر وان وإن محدش يقدر يتحداه.
وخلال الأغنية ظهر رمضان بماسك الجوكر وظهر كمان بحيوانات مفترسة، واللي استخدمهم رمضان في أكتر من كليب، ولكن المرة دي مش بس ظهر مع شبل، ولكن التمساح كمان اللي واضح إنه انضم لقائمة الحيوانات المفضلة لرمضان، والأغنية اللي من كلمات كلوشة الفنار وإسلام شندي وإخراج حسام الحسيني، تخطت المليون مشاهدة خلال الـ 17 ساعة اللي فاتوا بس. وده طبعًا شيء متوقع لإن رمضان معروف إنه بيكسر الأرقام القياسية في المشاهدة فمثلًا أغنية إنساى اللي اشترك فيها رمضان مع سعد لمجرد تخطت 305 مليون مشاهدة من وقت نزولها، وأغنية رايحين نسهر (بام بام) ومافيا اللي عدوا 212 مليون مشاهدة.
والسنة اللي فاتت تخطى عدد مشاهدات قناته على يوتيوب أكتر من 2 مليار و400 مليون مشاهدة وده اللي خلاه أكتر الفنانين مشاهدة في الشرق الأوسط كله، أما بالنسبة للجاكيت اللي كان لابسه رمضان خلال الفيديو كليب، فهو من ماركة Fendi وسعره يعادل 55 ألف جنيه مصري.. لما بيجي الموضوع للأرقام، محمد رمضان مايتخافش عليه!