السعودية: قصرت الحج السنة دي على المواطنين والمقيمين

أعلنت وزارة الحج والعمرة السعودية قصر الحج والعمرة السنة دي على المقيمين في السعودية بإجمالي عدد 60 ألف حاج فقط، وده بسبب التطورات اللي بتشهدها العالم بسبب فيروس كورونا المستجد، وإن الوضع عمال بيزداد سوء مش بيتحسن، وده بعد ما تحورات وسلالات وأعراض جديدة كل شوية بتظهر على الساحة، والعالم مابقاش عارف يسيطر على الموضوع ازاي، ولحد دلوقتي مفيش علاج.

فقررت السعودية إنها تقنن الموضوع شوية على قد ما تقدر حفاظًا على أرواح الناس، فأصدرت وزارة الحج بيان ومش بس كده، دي وضعت شروط معينة من خلال البيان للـ 60 ألف شخص اللي هيعملوا الحج، والشروط كانت من ضمن الضوابط المتبعة في المملكة من وقت جائحة كورونا سنة 2020.

ظوابط وشروط التسجيل في الحج للمقيمين في السعودية

  • إنهم لازم يبقوا ضمن الفئة العمرية (18-65 سنة) من الحاصلين على اللقاح، يعني الحصول على اللقاح شرط أساسي للراغبين في أداء مناسك الحج السنة دي.
  • التسجيل للمقيمين من داخل المملكة من جميع الجنسيات سواء سعودي أو غير سعودي وده من خلال المسار الإلكتروني اللي بتطلقه وزارة الحج والعمرة من وقت الجائحة.
  • ضروري إن الحالة الصحية للناس اللي هتقدم تكون خالية من أي أمراض مزمنة.

ودي ماكانتش أول مرة تقصر فيها السعودية الحج على المقيمين في المملكة، من وقت الجائحة وهي بتتخذ إجراءات صارمة علشان تقلل الموضوع على قد ما تقدر، وبالفعل نجحت في ده السنة اللي فاتت لما قصرت الحج على 10 آلاف حاج وكانت مقللة الفئة العمرية من 20-50 سنة، وده كان بعد ما كان إجباري إنهم يعملوا اختبار الـ PCR، وكانت من ضمن الإجراءات المشددة وقتها هو منع لمس الكعبة أو تقبيل الحجر الأسود المثبت في الكعبة المشرفة.

وبالرغم من إن تقليص عدد الحجاج للنسبة القليلة دي هيحرم المملكة من إيرادات ضخمة كانت بتحصل عليها كل سنة من ملايين الحجاج والمسافرين، إلا إن صحة وسلامة الناس عندهم في المقام الأول.

آخر كلمة: ماتفوتوش قراءة: بعد إغلاق استمر لـ 7 شهور، رجوع العمرة تدريجيًا في السعودية

تعليقات
Loading...
Tweet
Share
Share
Pin