ناس كتير في الفترة الأخيرة بقت بتتبع النظام الغذائي النباتي سواء الفيجان (اللي مببتاكلش فيه أي نوع من أنواع اللحوم أو الألبان أو مشتقاتها) أو الفيجيتريان (اللي مش بيتاكل فيه لحوم بس مسموح بالبيض والألبان) وبيحتاروا يجيبوا أكلهم منين، وعلشان كده جمعنالهم أكتر من مكان يقدروا يشتروا منه كل المنتجات اللي محتاجينها من غير ما يقلقوا إذا كانت داخلة فيها مشتقات حيوانية أو لا.
عندنا محل إيرثلي ديلايتس ( Earthly Delights) في الزمالك اللي كان مطعم The Vegan Kitchen سابقًا، وفي كمان هيلث هارفست (Health Harvest) في المهندسين ومدينة نصر، وكاجو اللي بيوزعوا منتجاتهم في بعض السوبر ماركتس، وبيوصلوا دليفري لحد البيت.
وفي كمان وزارة الزراعة في الدقي، ومنافذ بيعها المتوزعة على معظم أنحاء المحافظات، ففي 70 منفذ في محافظة الجيزة، و3 منافذ في محافظة القاهرة، والاسكندرية، والمنيا، ومنفذ واحد في محافظة المنوفية، والقليوبية، والوادي الجديد.
ومن المنتجات اللي هنلاقيها في المحلات دي الشوفان، والبروتين النباتي، وخلطات البرجر والكفتة المعمولة من مكونات نباتية، والطعمية، وفول الصويا، ولبن الصويا، ولبن اللوز، ولبن جوز الهند، والتوفو، وممكن كمان نلاقي توفو ني في محلات الأكل الصيني.
نظام الفيجان معروف أنه قليل في نسب الكوليسترول، وغني بالألياف، واحنا حضرنالكم وصفتين هيعجبوكم سهلين، ومش مكلفين، ومليانين بالفوائد الصحية كمان.
أومليت الحمص النباتي
المقادير اللي محتاجينها نص كوب دقيق حمص، وبصل أخضر، وطماطم متقطعة، وكزبرة طازة مفرومة، وملح، وفلفل، ومعلقة بيكينج باودر صغيرة، ومعلقة صغيرة من زيت الزيتون، وكوب مياه.
بنجيب المكونات دي كلها ونحطها في طبق غويط، ونصب المياه تدريجيًا مع التقليب المستمر لغاية ما يكون قوامه مناسب، وبعد كدة بنرفعه على النار في طاسة من غير زيت لغاية ما يستوي، وبالهنا والشفا.
كوكيز الفول السوداني
هنحتاج كوب زبدة فول سوداني ناعمة، وتلات أرباع كوب دقيق شوفان مطحون ناعم، وربع كوب عسل. نسخن الفرن على درجة حرارة 180 درجة، وندهن صينية بزيت زيتون، أو نفرشها بورق زبدة.
هنخلط العسل مع زبدة الفول السوداني لغاية ما يبقى المزيج ناعم وكريمي، بعدين نزود دقيق الشوفان، ونعجن كويس لغاية ما العجينة تتماسك وتكون طرية، وبعد كدة نعمل كور صغيرة من العجينة ونحطها في الصينية، وممكن نزينيها بحبات المكسرات.
