بين تصاعد في أرقام حالات الإصابات بفيروس كورونا والغلق التام اللي اضطرت تعمله بعض البلاد من تاني علشان تحاول تسيطر على انتشار الوباء، آخر حاجة حابين نسمع عنها، هو ظهور نوع جديد من المرض، ولما الفنان يوسف الشريف بيعلن عن عمل هيدخل بيه في أي سباق رمضاني، الكُل بيبقى متحمس وحرفيًا بيستنى المسلسل من السنة للسنة.. والفترة دي بالذات، كنا محتاجين نسمع عن عمل جديد ليوسف علشان يفرحنا شوية في وسط أخبار الكورونا اللي محوطانا من كل حاجة.. بس لما يطلعلنا الكوفيد حتى في أسماء الأعمال الدرامية.. نهرب فين؟
“يا ترى إيه اللي هيحصل سنة 2025، احذر منطقة خطر كوفيد-25 رمضان 2021″، ده اللي كتبه المنتج تامر مرسي وهو بيعلن عن مسلسل يوسف الشريف اللي هيشارك بيه في شهر رمضان القادم، وكمان إنجي علاء زوجة يوسف الشريف ومؤلفة المسلسل كتبت تغريدة عن المسلسل الجديد واتمنت ليه النجاح، وعلى طول التغريدة بقت تريندينج على تويتر، وعلق كمان الفنان أحمد أمين وبارك ليوسف على المسلسل وإنه “في انتظار الحلاوة كلها زى ما اتعودنا منه”.
وجنب تعليقات “شابوو يوسف الشريف من دلوقتي” اللي بقى من الطبيعي إننا نشوفها كل سنة بعد النجاحات اللي ورا بعض لمسلسلاته، ظهرلنا تعليقات ساخرة بخصوص اسم المسلسل المرة دي، وده بالمناسبة مالهوش أي علاقة الناس هتتفرج ولا لأ، لإن كده كده الموضوع اسمه يشد، خصوصًا إنه كمان يوسف اللي هيمثله، ولكن مانقدرش ننكر برضه إن نزول عمل درامي بالاسم ده، وسط شعب معروف بطبيعته الساخرة ماكنش ينفع إنه يعدي عادي كده، وبعد ما نزل البوستر الرسمي للمسلسل على طول، ماترددش رواد السوشيال ميديا في إنهم يطلعوا كل كبت وباء الكورونا في صورة كوميكس مختلفة على اسم المسلسل الجديد.
وفي كمان اللي علقوا على فكرة إن المسلسل اللي قبلوا هو كمان كان اسمه “النهاية” واللي مايختلفش أوي عن كوفيد-25 اللي بيوصلنا لنفس الحاجة.. مفيش أسماء مشرقة شوية عن كده يا جماعة؟
طبعًا مهما الفنان يوسف الشريف اختار أسامي مخيفة إلى حد ما، برضه هنفضل نحب أعماله ونتفرج عليها لإنها حقيقي بتكون استثنائية ومختلفة، بس كوفيد-25؟ لا بصراحة كان لازم نتوقف عند الاسم ده علشان كتير علينا كل جرعة الكوفيدو دي! هل كنتوا من فريق “شابوو يوسف الشريف من دلوقتي” لما شوفتو الاعلان، ولا كنتوا من فريق “إيه ده في إيه؟”.. المنافسة شرسة بين الفريقين!