كل اللي محتاج تعرفه عن أزمة محمد صلاح مع ليفربول

أزمة مستمرة ومكتومة بين محمد صلاح وليفربول بعد التسريبات الأخيرة اللي كشف عنها موقع “ذا أتلتيك” الأمريكي، وهو موقع ليه مصداقية كبيرة أكد فيها إن صلاح مستعد أنه ينتقل لواحد من الفرق الكبيرة في الدوري الإنجليزي في حالة إنه ساب ليفربول، لإنه مش عاوز يسيب إنجلترا لظروف مختلفة وأسرية.

سلسلة أزمات وغضب جماهيري ضد صلاح

التسريبات دي واحدة من سلسلة طويلة في أزمة تجديد عقده مع ليفربول اللي هينتهي السنة الجاية واللي ممكن بعدها ينتقل ببلاش لأي نادي تاني وهو اتسبب في حالة من الغضب جوا النادي ووسائل الإعلام والمواقع التابعة ليه خصوصا الجماهيرية.

صلاح مع ليفربول – Sports Illustrated

تقرير لموقع “أنفليد ووتش” أشار لحالة الغضب دي جوه الإدارة نفسها في ليفربول، وأكد التقرير أن الإدارة معندهاش حد فوق النادي وده سر غضبها اللي وصفته بالشديد علي محمد صلاح.

تأثير سيء لرامي عباس

قبل كده ظهرت تقارير بتُشير لاحتمال انتقال محمد صلاح لبرشلونة أو ريال مدريد، وده ماعملش نفس حالة الغضب اللي شايفنها دلوقتي، إلا إن كلامه عن رغبته في نادي تاني جوا إنجلترا أتسبب في جدل كبير بين الجماهير؛ وده الغضب اللي فسره البعض إنه بسبب وكيل أعماله، رامي عباس، اللي ممكن يكون ورا التسريبات دي بهدف رفع قيمة التجديد بتاع صلاح مع ليفربول. وبالرغم من كل ده، التقارير بتقول إن مُلاك ليفربول مش هيستجيبوا للطلبات المالية بتاعة صلاح، ووكيله وهو اللي هيفتح الباب إنه يمشي في ٢٠٢٣ ببلاش.

رامي عباس – GQ Magazine

تأثير رامي عباس ممكن يكون كويس من الناحية المادية لصلاح، ودي حاجة لسه مش مؤكدة، إلا إن تأثيره الجماهيري هيبقى وحش.

مشروع ليفربول

تجديد إدارة النادي للمدرب يورجن كلوب وبحسب تقرير “أنفيلد ووتش” هو رسالة واضحة إن المشروع اللي بدأه المدرب الألماني لما جيه هيكمل بغض النظر عن أسامي اللاعبين اللي معاه.

صلاح بيفاوض مع إدارة ليفربول من شهور علشان يجدد عقده وبيطلب مبلغ بين ٤٠٠ و٥٠٠ ألف إسترليني في الأسبوع وبراتب إجمالي ٨٠ مليون جنيه إسترليني، وده بعقد بيمتد لأربع سنين، وده بيهدم هيكل الرواتب في النادي.

صلاح مع ليفربول

صلاح أنتقل لليفربول في صيف ٢٠١٧ من روما، ولعب ٢٥٤ ماتش في كل البطولات، وسجل ١٥٦ هدف، وفاز بست بطولات بين دوري أبطال أوروبا والدوري الإنجليزي.

آخر كلمة: ماتفوتوش قراءة: صلاح وليفربول: استمرار المفاوضات وبرشلونة خيار غير مطروح من الأساس

تعليقات
Loading...
Tweet
Share
Share
Pin