طول اليومين اللي فاتوا وقبلها لأسابيع، ظهرت تصريحات متضاربة بخصوص مفاوضات تجديد عقد محمد صلاح مع ليفربول.
اللي متابع كورة كويس، خصوصًا على مواقع التواصل الاجتماعي، هيكون عارف اسم الصحفي الرياضي الأشهر “فابريزيو رومانو” اللي أكد على حسابه في تويتر إن المفاوضات لسه مستمرة بين الجانبين.
رومانو أشار في الوقت نفسه للكلام اللي تردد خلال الفترة الأخيرة عن رغبة برشلونة التعاقد معه، وأكد إن برشلونة عمره ما كان خيار مطروح أصلًا لصلاح.
Jurgen Klopp on Mo Salah’s contract: “There’s nothing new to say about Mo. The decisive parties are talking to each other and that is all I need”. 🔴 #LFC
Barcelona has never been an option for Salah. He’s not planning for La Liga move as things stand. pic.twitter.com/1t419XGW4Y
— Fabrizio Romano (@FabrizioRomano) April 4, 2022
صحيفة “ميرور” وبداية الكلام حوالين موافقة صلاح
خلال الساعات القليلة اللي فاتت، خرجت صحيفة “ميرور” البريطانية وأكدت إن صلاح قرب كتير من التوقيع على عقد جديد مع “الريدز”، وعلى أساسه هيفضل معاهم لنهاية مسيرته في الملاعب.
الرواتب.. بداية الأزمة
رفض صلاح الشروط الجديدة لعقده مع ليفربول قبل كده واللي كان هيحصل بموجبها على 400 ألف إسترليني أسبوعيًا، وحاولت إدارة ليفربول الوصول لإتفاق مع محمد صلاح على مدار شهور وماحصلش بسبب الاختلاف في الراتب المالي؛ لإن كسر صلاح سقف الرواتب المالية بالفريق وده ممكن يخلق أزمة.
ورغم ظهور تقارير صحفية خلال الساعات الأخيرة بتقول إن محمد صلاح تراجع عن موقفه تجاه الراتب المالي وقرر الموافقة على عرض ليفربول، إلا إن “فابريزيو رومانو” نفى الكلام ده.
تصريحات كلوب
مدرب ليفربول الألماني “يورجن كلوب” قال في تصريحات سابقة إن المحادثات الجارية عن تجديد عقد صلاح هتأثر على أداء الفريق، وبالتالي فرصه في الفوز بالألقاب. والتصريحات دي أربكت كتير من جماهير ليفربول ومحبيه والإعلام الرياضي لوقت طويل، والبعض اعتبرها إشارة لوجود أزمة حقيقية، ومنها أنتشر الكلام والمتابعة المستمرة القلقة حوالين استمرار صلاح مع ناديه.