في اليوم العالمي للشباب: أفلام ومسلسلات ناقشت قضايا مختلفة ليهم

العالم بيحتفل النهارده بيوم مخصوص للشباب.. غير إنهم أمل المستقبل وكل حاجة بإيديهم وكل حاجة بنسمعها من أيام سبيس تون، الشباب دلوقتي يمكن بيواجهوا تحديات مختلفة عن شباب الأجيال اللي فاتت، بيحصل حواليهم حاجات كتير جدًا، وفي مشاكل وتحديات بتواجههم لأول مرة جيل يواجهها. يمكن مفيش كتالوج نمشي عليه، كل واحد وتجربته، بس في العموم بنتبسط بالأعمال الفنية اللي بنحس إنها بتعبر عننا وعن حياتنا ومشاكلنا والحاجات اللي بنواجهها، بنتعلم منها حاجات أكيد، وبتحسسنا إننا مش لوحدنا. قررنا نفتكر شوية منهم في اليوم العالمي للشباب.

أوقات فراغ – 2006

ممكن وقتها كان يُعتبر صادم شوية، أو الناس مش مقتنعة إن دي مشاكل موجودة حواليهم فعلًا، بس الفيلم ده ناقش حياة شلة شباب بتفاصيل حياتهم، الروشنة والجامعة والارتباط، والصياعة كمان شوية، بيفكروا في مستقبلهم ازاي. ونقطة تحوّل بتحصل لما واحد منهم يتوفى، تخليهم يراجعوا حياتهم وتصرفاتهم، وانتهى الفيلم بقفلة بتعبر عن الشباب لحد دلوقتي، برتم هادي بيقول بنلف في دواير والدنيا تلف بينا دايمًا ننتهي لمطرح ما ابتدينا.. لحد أخر الأغنية اللي كلماتها أكيد عبّرت عنك في وقت من الأوقات.

لا تطفئ الشمس – 2017

بتغيير بسيط عن الرواية، وعن الفيلم اللي أتعمل في 1961. المسلسل اللي أتعمل في 2017 ناقش حياة شباب بأعمار مختلفة كمان، ومن عيلة واحدة، بتشوف في العيلة الواحدة ازاي كل واحد عايش حياة مختلفة عن التاني وبيواجه مشاكل وتحديات مختلفة؛ اللي شايف مستقبله بطريقة مختلفة عن اللي أهله شايفينها وبيحارب علشان يحقق اللي في دماغه، واللي بتقع في مشكلة كبيرة بسبب إنها على علاقة مع أستاذها في الجامعة، واللي مش عارف يلاقي نفسه من الأساس وشخصيته بتتغير 180 درجة. لو ركزت في مسار كل واحد فيهم، هتلاقي كل المشاكل دي موجودة حواليك، وهتلاقي نفسك في شخصية منهم.

ميكروفون – 2010

في إطار المزيكا، ورحلة الفيلم بأبطاله اللي بتلف حوالين الموسيقى البديلة ومفهومها في مصر، وبدايتها في الإسكندرية تحديدًا، وسط كل ده بتلاقي برضه حياة الشباب اللي في الفيلم. قصص وحكايات لكل واحد؛ سواء حلمه إنه يكمل في المزيكا بس في حاجات كتير واقفة في طريقه، واللي بيحبوا بعض وقصتهم لسبب ما مش بتكمل، واللي بتهاجر برا البلد علشان شايفة مستقبلها برا وبيترتب على ده تغيير في شخصيتها وشخصية حبيبها كمان، اللي بيتجه إنه يكشتف موسيقى ماحدش يعرف عنها، ويحاول مع أصحابها يخرجوها للنور.

عدم تقبل الحاجة الجديدة، اللي تمثلت في الموسيقى نفسها في الفيلم ده، موسيقى غير اللي متعودين عليها في الوقت ده، والرفض اللي كانت بتواجهه، والموسيقيين دول نفسهم وهما بيحاولوا يلاقوا فرصة للجديد اللي بيقدموه ويوصلوه للناس.

سهر الليالي – 2003

عن: filfan

مش بس فيلم بيتكلم عن علاقات الحب في أشكال مختلفة بقصص متنوعة، لكن بيعرض كمان الشباب في المرحلة دي بيفكروا ازاي، حياتهم وأحلامهم، كل واحد وواحدة منهم شايف مستقبله ازاي، وبيحاول ازاي يكون أحسن، وتتعقد علاقاتهم وبعدين تتحل، ده كمان واحد من الأفلام اللي باحتمال كبير هتلاقي نفسك في شخصية منه.

صعيدي في الجامعة الأمريكية – 1998

عن: zamanpost

تخيل إن الفيلم اللي بنشوفه من زمان ده وكله ضحك يبقى بيناقش حاجة كبيرة زيّ عقدة الخواجة، اللي بنعاني منها لحد دلوقتي، وإننا لازم نكون بشكل معين علشان نعجب الناس، بس على رأي همام “ياما ناس لابسة بس قليلة الرباية”. يعني، ومش لازم نلبس ونتكجول ونتأمرك علشان نبقى كويسين، وهمام أثبتلنا ده.

مين قال – 2022

المختلف في المسلسل ده إنه بيناقش مشاكل جيل الشباب الصغير، سن قبل الـ 20، وهما لسه بيحاولوا يكتشفوا هما عايزين إيه وبيحددوا مستقبلهم، بيحبوا إيه وعايزين يختاروا إيه، مشاكلهم مع أهلهم اللي ممكن يبقوا مفيش بينهم تواصل كافي، أو الأهل مش فاهمينهم من الأساس ومعتبرينهم “عيال”.

شوفنا المسلسل بيناقش مشاكل بيواجهها الجيل الجديد، خصوصًا مع الأهالي، ومع بعض في المدرسة، من تنمر لمقاييس ومعايير كلنا بنقابلها وبنواجهها في حياتنا، حاجات كتير أثرت في الناس بشكل حقيقي. وكل ده في 15 حلقة بس، من غير مط وتطويل.

أخر كلمة: ماتفوتوش قراءة: “كباتن الزعتري”.. أحلام وأمال مخرج مصري وشباب سوريا

تعليقات
Loading...
Tweet
Share
Share
Pin