غير الفُسح في أماكن جديدة وغالية أو فيها حاجات كتيرة تتعمل، ساعات بنحس إننا عايزين فسحة بسيطة وقريبة، ومفيش اختيار أحسن من وسط البلد لكده، بالجو الكامل اللي فيها بشوارعها والمحلات فيها والمطاعم، والتمشية هناك وانت بتاكل سندوتشات، وبتحلي بأيس كريم، أو تقعد على قهوة بالمعني الحقيقي لكلمة القهوة البلدي في مكانها الأصلي، لو مش عارف أماكن تتفسح فيها في وسط البلد أو مش عارف تعمل إيه هناك، تعالى نقولك.
غير القهاوي اللي كده كده أساسية في فسحة زي دي، ممكن تقعد في كافيه مميز زي ريش كافيه، وتشرب مشروبك المفضل في قهوة تاريخية عمرها أكتر من 100 سنة، وكان بيتقابل فيه المثقفين وأعضاء المقاومة في ثورة 1919، وهو ملتقى المثقفين والفنانين، تقدر تشوف إزاي هتروحه من هنا.
لو عايز تجرب تكون في روما وانت في وسط البلد، بننصحك تروح تجرب مطعم (Cairoma) موجود في شارع يوسف الجندي، ديكور وأكل إيطالي مع أغاني هتحسسك إنك في قلب روما وتقدر تروحه من هنا.
ولو نفسك في فطار مصري أصيل، يليق مع مكان بيعبر عن مصر فعلًا، بديكور بيكمل الجو العام لكل ده، ممكن تروح تفطر الصبح بدري في الكوخ، وتقدروا تشوفوا مكانه بالظبط من هنا.
وفي وسط التمشية، خد لفة في محلات التحف والأنتيكات، اللي هتاخدك لأزمنة تانية كانت هادية وجميلة، هتحس بأجوائها من مجرد ما تتفرج على الأنتيكات.
لو بقى بعد ما فطرت وقعدت على القهوة شربت اللي انت عايزه وخدت لفتك في الشوارع، وعايز بعدها تاكل أكلة سريعة، ممكن تعدي على “سامح” بتاع السندوتشات، وتقضيها سندوتشات على السريع، وتروح من هنا.
