فاكهة الشتا وفوايد قشرتها للبشرة مع وصفات لماسكات

فصل الصيف خلص والشتا داخل علينا وجايب معاه فاكهته الكتيرة الحلوة اللي بنفضل نأكل فيها طول الوقت علشان نتدفى، لإن البرد بيحب الأكل، ففي فاكهة كتيرة بتطلع في فصل الشتا زيّ البرتقال، واليوستفندي، والموز، والليمون، والرمان، والجوافة، والفراولة.

فوايد الفاكهة ماتتعدش، فهي بتقلل مستوى الكوليسترول والدهون في الجسم، وبتساعد في الوقاية ضد فقر الدم والحديد، ومليانة بوتاسيوم كتير بيساعد في الوقاية من أمراض القلب، وكمان الفاكهة نقدر نستخدمها وبالذات نستخدم قشرها علشان نحافظ على صحة البشرة والعناية بيها.. فتعالوا نتعرف على فوايد بعض الفاكهة دي ووصفات ماسكات ليهم للبشرة.

البرتقال

البرتقال من فاكهة الشتا الحمضية وبتساعد في الوقاية من الإنفلونزا، وقشره كمان مفيد، وبيحمي البشرة من الجفاف، وبينضف المسامات اللي بتكون مليانة جراثيم وبكتيريا من العوامل الخارجية اللي البشرة بتتعرضلها، وكمان بيجدد الخلايا الميتة، وبينعم وبيرطب البشرة، وبيقضي على الحبوب والرؤوس السوداء. علشان كده جبنالكم وصفة لماسك للوش.

ماسك قشر البرتقال بالكركم

هنحتاج معلقة كبيرة من قشر البرتقال، ومعلقة كبيرة من الكركم المطحون، ونص كوباية مياه مغلي.

هنخلط القشر والكركم مع بعض، ونزود المياه ونعجنهم بالايد علشان يتماسكوا كويس، وندهنه على وشنا مع الفرك لمدة خمس دقايق، بعد كده نسيبه نص ساعة، ونشطفه بالمياه والصابون.

الليمون

عن: webteb

الليمون من الفواكه اللي فيها مضادات أكسدة، بيرطب وينعم البشرة، وبيساعد في التخلص من سموم البشرة، وبيفتح المسام، وبيعالج الحبوب، وبيقلل إفراز الزيوت للبشرة الدهنية.

ماسك قشر الليمون بالحليب

عن: sayidaty

هنحتاج معلقة كبيرة من قشر الليمون وكمية من اللبن البارد تكفي الخليط علشان يكون متماسك مش سايب، وندهنه على وشنا ونسيبه لمدة نص ساعة، وبعد كده نشطفه بمياه باردة.

اقرأ كمان: نبتة الخلود عند قدماء المصريين: إتعرفوا على فوائد الصبار واستخداماته

اليوستفندي

عن: modo3

اليوستفندي مليان فيتامين “س” اللي بيغذي البشرة، وفيه مضادات للأكسدة بتساعد في الوقاية من الأشعة فوق البنفسجية.

ماسك قشر اليوستفندي مع زيت الزيتون

هنحتاج معلقتين كبار من زيت اللوز ومعلقة كبيرة من قشر اليوستفندي.. هنخلطهم سوا وندهنهم على وشنا ونسيب الخليط لمدة ربع ساعة، ونغسله بمياه.

الجوافة

قشر الجوافة فيه مطهر طبيعي بيساعد على تنضيف البشرة، وحمايتها من السموم والحبوب، وبتعالج حساسية البشرة، فبتقلل الاحمرار والهرش، وفيه فيتامين “ج” اللي فيه كولاجين، وبيساعد على مكافحة الشيخوخة والتجاعيد.

ماسك قشر الجوافة بالعسل

عن: hiamag

هنحتاج قشر جوافة ومعلقة عسل صغيرة، هنخلطهم سوا كويس، وندهنه على وشنا ونسيبه لمدة 20 دقيقة، وبعد كده نغسله بمياه دافية.

الرمان

عن: albayan

قشر الرمان موجود فيه فيتامين “س” اللي بيقلل الحبوب، وبيساعد في تلطيف البشرة من الالتهابات، وبيتخلص من الخلايا الميتة.

ماسك قشر الرمان والليمون

عن: yalalla

هنحتاج معلقتين كبار من قشر الرمان، ومعلقة صغيرة من عصير الليمون.

هنحط قشر الرمان على النار لغاية ما يكون خفيف ولونه يغمق علشان يتحول لبودرة. بعد كده هنخلط معلقتين كبار من البودرة مع الليمون لغاية ما تتماسك. هندهن الخليط على وشنا، ونسيبه على وشنا لمدة 20 دقيقة، ونغسله بمياه.

آخر كلمة: ماتفوتوش قراءة: القهوة مش بس للشرب: اتعرفوا على وصفات القهوة وفوائدها للبشرة.

تعليقات
Loading...
Tweet
Share
Share
Pin