لما بتيجي تتفرج على مسلسل، سواء على التليفزيون أو حتى على الانترنت، فأنت غالبًا يا بتكتم الصوت لحد ما تتر المسلسل يخلص، يا بتفوت المقدمة وتدخل على الحلقة على طول لو بتتفرج على منصة إلكترونية، مش كده؟ ولكن في كده مطربين ومطربات، بيعرفوا إزاي بصوتهم واختيارهم للأغاني إنهم يخلونا نكسر القاعدة دي… وبدل ما نبقى بنفوت تتر البداية، بنستنى المسلسلات مخصوص بس علشانه.
مدحت صالح
بدون منازع، مدحت صالح هو ملك أغاني تترات المسلسلات، اللي بيكون جزء لا يتجزأ من نجاح العمل في المطلق، بسبب صوتة وأغانيه اللي بتضيف حلاوة على حلاوة المسلسل نفسه.. مين فينا مبيحبش أغنية تتر مسلسل الحقيقة والسراب؟ وعباس الأبيض في اليوم الأسود، وحضرة المتهم أبي، وسكة الهلالي؟ ده إحنا سيرة المسلسلات دي لوحدها، بتجبلنا شعور بالنوستالجيا وبتفكرنا على طول بالأغاني اللي كلها إحساس وفن. لما يكون تتر المسلسل بيقدمه مدحت صالح، المسلسل بيبقى تلقائيًا أحلى 10 مرات!
علي الحجار
من الأصوات المميزة اللي لوحده كافي إنه يخلينا نشوف إن أي أغنية تستحق إنها تتسمع لمجرد إن الفنان علي الحجار هو اللي بيغنيها، فالكنز اللي سبهولنا من أغاني التترات المختلفة، بجد لا يُقدر بثمن. خصوصًا إن معظم التترات اللي قدمها كانت لمسلسلات قديمة زيّ مسلسل العصيان، والليل وآخره اللي بتمثل تراث الكل بيعتز بيه.
شيرين عبدالوهاب
فاكرين إزاي الأغنية دي عملت ضجة أول ما نزلت؟ أغنية مشاعر اللي كانت تتر مسلسل غادة عبد الرازق “حكاية حياة” كانت تحفة فنية بكل معنى الكلمة، وده بيرجع لكلام الأغنية المميز والموسيقى وطبعًا لصوت شيرين. أتحداك لو كنت تقدر تعدي التتر! ده غير طبعًا أغاني تانية قدمتها شيرين زيّ تتر مسلسل “حلاوة الدنيا” اللي كان الكُل بيتكلم عنه وقت عرضه في رمضان.
إليسا
رغم إن عدد التترات اللي غنتها إليسا ماكنتش كتيرة، بس قدرت تسيب بصمة قوية في الحتة دي، وتضيف لأي عمل بتغني التتر ليه.. فأغنية “يا ريت”، و”لو”، و”عشت وشفت”، وكمان أغنية تتر مسلسل مع سبق الإصرار كلهم دون استثناء من أجمل أغاني إليسا.
اقرأ أيضًا: الفنان أمير المصري يشارك في مسلسل “Industry” من إنتاج HBO.
أنغام
أنغام من الأصوات الجميلة اللي من الصعب إنك تفوتلها أي أغنية شغالة، حتى لو مجرد تتر لمسلسل. ففي تترات مختلفة زيّ تتر مسلسل “حدوتة مرة” ومسلسل “في غمضة عين” و”حديث الصباح والمساء”، وكتير من الأغاني التانية، قدرت الفنانة أنغام إنها تمتعنا بصوتها القوي والمميز.
وائل جسار
الفنان وائل جسار قدم كتير للدراما المصرية من خلال تقديمه تترات كتير لمسلسلات ناجحة ومحبوبة زيّ مسلسل الدالي، والشك، وختم النمر، وناصر.. والحقيقة إن وائل جسار بيقدر يغير من أنواع الأغاني اللي بيقدمها لتترات المسلسلات المختلفة، من جد أو رومانسي أو حزين… وكل الألوان بتليق عليه!
نانسي عجرم
طبعًا منقدرش ننسى دور نانسي عجرم القوي، وخلتنا نحب تترات المسلسلات بصوتها المرح والرقيق، وقدر أصحاب الأعمال الدرامية إنهم يستغلوا صوتها في إنهم يضيفوا روح مميزة لأعمالهم عن طريق اختيارهم لنانسي علشان تغني التترات.. وأشهرهم مثلًا مسلسل “حكايات بنات” اللي تتر أغنيته جزء أساسي من هوية المسلسل في المجمل.